یلو لائن کرپشن اسکینڈل: چیف منسٹر انسپیکشن ٹیم کی انکوائری رپورٹ جاری،

کراچی: کراچی بی آر ٹی یلو لائن پراجیکٹ میں اربوں روپے کی مالی بے ضابطگیوں اور غیر محفوظ ادائیگیوں کے معاملے پر چیف منسٹر انسپیکشن ٹیم کی فائنل انکوائری رپورٹ منظرِ عام پر آ گئی ہے، جس کی روشنی میں سابق پراجیکٹ ڈائریکٹر ضمیر عباسی کو لاہور سے گرفتار کر لیا گیا ہے۔ رپورٹ میں سابق پی ڈی ضمیر عباسی اور سابق ڈائریکٹر پروکیورمنٹ جھامن (جمن) داس کو جام صادق برج، ڈپو ون اور ڈپو ٹو منصوبوں میں مالیاتی قواعد و ضوابط کی سنگین خلاف ورزیوں اور کنسلٹنٹس کے نگرانی کے نظام کو نظر انداز کرنے پر بنیادی طور پر ذمہ دار قرار دیتے ہوئے ان کے خلاف محکمانہ اور فوجداری کارروائی کی سفارش کی گئی ہے۔ انکوائری کا بنیادی محور سال 2025 اور 2026 کے دوران کی گئی اضافی ادائیگیاں تھیں، جبکہ سیکریٹری ٹرانسپورٹ اسد زمین، موجودہ پی ڈی کمال حکیم، سید طٰہٰ عزیز شاہ اور فنانشل اسپیشلسٹ عبدالواسی کے بیانات ریکارڈ کرنے کے بعد انہیں کلیئر قرار دیا گیا ہے اور ان کے خلاف کسی بھی قسم کی کارروائی یا مالی بدعنوانی کا الزام عائد نہیں کیا گیا۔ چیف منسٹر انسپکشن ٹیم کی اس تفصیلی رپورٹ کے بعد اینٹی کرپشن حکام نے باقاعدہ مقدمہ درج کر کے کارروائی کا آغاز کر دیا ہے۔