اسرائیل نے خطے میں نیا محاذ کھولنے کی تیاری شروع کردی

مشرقِ وسطیٰ میں جاری شدید کشیدگی کے دوران اسرائیل نے خطے میں ایک اور نیا جنگی محاذ کھولنے کی باقاعدہ تیاریاں شروع کر دی ہیں۔ بین الاقوامی میڈیا رپورٹس کے مطابق، اسرائیلی دفاعی حکام اب یمن پر ایک بڑے فوجی حملے کی منصوبہ بندی کر رہے ہیں، جبکہ دوسری جانب اسرائیل نے جنوبی لبنان سے اپنی فوجوں کے مکمل انخلا سے صاف انکار کر دیا ہے۔ اسرائیلی وزیراعظم بنجمن نیتن یاہو نے کٹھ حجتی کا مظاہرہ کرتے ہوئے جنوبی لبنان میں مستقل ‘سیکیورٹی بفر زون’ قائم کرنے کا باقاعدہ اعلان کیا ہے اور واضح کیا ہے کہ لبنان میں ابھی ان کے مزید فوجی اقدامات اور کارروائیاں باقی ہیں۔

اسرائیل کی جانب سے یہ نئی جنگی حکمتِ عملی ایک ایسے وقت میں سامنے آئی ہے جب اس نے امریکی صدر ڈونلڈ ٹرمپ کی واضح ہدایات اور احکامات کو یکسر نظرانداز کرتے ہوئے جنوبی لبنان میں جنگ بندی معاہدے کی ایک بار پھر سنگین خلاف ورزی کی ہے۔ صدر ڈونلڈ ٹرمپ نے اسرائیل کو لبنان پر حملوں سے سختی سے منع کیا تھا، تاہم اسرائیلی فوج نے ان احکامات کی پرواہ نہ کرتے ہوئے لبنان کے ضلع نبطیہ میں ڈرون حملہ کیا جس کے نتیجے میں 2 عام شہری شہید ہو گئے۔ اسرائیلی ڈرون نے کفر رمان کے علاقے میں ایک سویلین گاڑی کو نشانہ بنایا۔ مبصرین کے مطابق، اسرائیل کی جانب سے واشنگٹن کی جنگ بندی کوششوں کو سبوتاژ کرنے اور یمن پر حملے کی تیاریوں سے پورا خطہ ایک نئی اور طویل جنگ کی دلدل میں دھنس سکتا ہے