لندن ہاکی پرو لیگ میں پاکستانی پرچم کی غلط نمائش, انٹرنیشنل ہاکی فیڈریشن کی صدر پی ایچ ایف محی الدین احمد وانی سے غیر مشروط معذرت

لندن میں منعقدہ ہاکی پرو لیگ میچ کے دوران پاکستانی قومی پرچم کی غلط نمائش پر انٹرنیشنل ہاکی فیڈریشن (FIH) نے پاکستان ہاکی فیڈریشن (PHF) سے باضابطہ طور پر غیر مشروط معذرت کر لی ہے۔ ایف آئی ایچ ہاکی پرو لیگ کی ڈائریکٹر ہلیری اٹکنسن نے پی ایچ ایف کے صدر محی الدین احمد وانی کو ایک مکتوب ارسال کیا ہے، جس میں انہوں نے اس آپریشنل غلطی پر گہرے افسوس کا اظہار کیا ہے۔ خط میں کہا گیا ہے کہ بین الاقوامی فیڈریشن اس سنگین غلطی کی مکمل ذمہ داری قبول کرتی ہے اور بغیر کسی عذر کے معافی کی خواستگار ہے۔ ڈائریکٹر ہلیری اٹکنسن کا کہنا تھا کہ پرچم کسی بھی ملک کی شناخت، فخر اور نمائندگی کا اہم ترین نشان ہوتا ہے، اور اس واقعے سے پاکستانی ٹیم، مداحوں اور عوام کے جذبات کو جو ٹھیس پہنچی ہے، اس پر فیڈریشن کو شدید افسوس ہے۔ انہوں نے یقین دہانی کرائی کہ مستقبل میں ایسے واقعات کو روکنے کے لیے اندرونی طریقہ کار اور آپریشنل مراحل کا دوبارہ جائزہ لیا جا رہا ہے۔ خط کے آخر میں انہوں نے پاکستان کی پرو لیگ میں شرکت اور کھیل کے لیے ان کے عزم کو سراہتے ہوئے صدر پی ایچ ایف سے مخلصانہ معذرت قبول کرنے کی درخواست کی ہے۔