صدر آصف زرداری کا این ڈی یو کا دورہ،ورکشاپ کے شرکاء میں اسناد تقسیم کیں

صدرِ مملکت آصف علی زرداری نے نیشنل ڈیفنس یونیورسٹی اسلام آباد کا دورہ کیا، جہاں انہوں نے نیشنل سکیورٹی ورکشاپ کے 27ویں ایڈیشن کے شرکا سے خطاب کیا

ورکشاپ میں اراکینِ پارلیمنٹ، سینئر سول و عسکری افسران، تعلیمی اداروں اور سول سوسائٹی کے نمائندگان نے شرکت کی۔ این ایس ڈبلیو 27 کا مقصد جامع قومی سلامتی کے فریم ورک کے تحت قومی طاقت کے مختلف عناصر کے باہمی تعلق اور کردار کے بارے میں شرکا کی سمجھ کو مزید گہرا کرنا تھا۔اپنے خطاب میں صدرِ پاکستان نے ورکشاپ کی کامیاب تکمیل پر شرکا کو مبارکباد دی اور قومی سلامتی سے متعلق آگہی بڑھانے کے لیے ان کی لگن کو سراہا۔ انہوں نے پاکستان کو درپیش موجودہ سکیورٹی چیلنجز کے حل کے لیے باخبر قیادت، قومی یکجہتی اور مربوط پالیسی سازی کی اہمیت پر زور دیا۔صدر نے کہا کہ این ڈی یو کی نیشنل سکیورٹی ورکشاپ قومی سطح پر مکالمے کے فروغ، ادارہ جاتی استعداد کار میں اضافے اور قومی سلامتی کے حوالے سے ہمہ گیر قومی حکمتِ عملی کو مضبوط بنانے کے لیے ملک کے نمایاں ترین پلیٹ فارمز میں سے ایک ہے۔
آخر میں صدرِ پاکستان نے ورکشاپ مکمل کرنے والے شرکا میں اسناد بھی تقسیم کیں