امریکہ کا فوجی ہیلی کاپٹر گرانے کے جواب میں ایران پر حملہ، مختلف علاقوں میں دھماکے

 امریکا نے اپنے فوجی اپاچی ہیلی کاپٹر کو نشانہ بنائے جانے کے دعوے کے بعد ایران کے خلاف فوجی کارروائی شروع کر دی، جبکہ ایرانی صوبے ہرمزگان اور دیگر علاقوں میں دھماکوں کی اطلاعات موصول ہوئی ہیں۔

ایرانی خبر رساں اداروں کے مطابق ہرمزگان کے مشرقی علاقوں میں زور دار دھماکوں کی آوازیں سنی گئیں، جبکہ سیریک کے علاقے میں میزائل حملے کی بھی اطلاع دی گئی ہے۔

ایرانی سرکاری ذرائع کا کہنا ہے کہ خلیج میں واقع جزیرہ قشم کو بھی نشانہ بنایا گیا، جبکہ بندرعباس میں متعدد دھماکوں کی اطلاعات سامنے آئی ہیں۔

امریکی مرکزی عسکری کمان نے ایک بیان میں کہا ہے کہ ایران کے خلاف دفاعی نوعیت کی کارروائیاں شروع کر دی گئی ہیں۔ بیان کے مطابق یہ حملے گزشتہ روز امریکی فوج کے اپاچی ہیلی کاپٹر کو نشانہ بنائے جانے کے جواب میں کیے گئے ہیں۔

امریکی ذرائع ابلاغ کے مطابق امریکی حکام کا کہنا ہے کہ آبنائے ہرمز کے قریب ایران کے ریڈار اور فضائی دفاعی نظام کو نشانہ بنایا گیا ہے۔

دوسری جانب ایرانی پاسداران انقلاب نے اعلان کیا ہے کہ ان حملوں کا بھرپور جواب دیا جائے گا۔ ایرانی سرکاری ذرائع کے مطابق اطلاعات ہیں کہ ایران امریکی اہداف کے خلاف میزائلوں اور بغیر پائلٹ طیاروں کا استعمال کر رہا ہے۔

ایرانی حکام کا کہنا ہے کہ جنوبی ایران میں حملوں کے بعد صورتحال قابو میں ہے اور متعلقہ ادارے حالات کا جائزہ لے رہے ہیں۔

یاد رہے کہ امریکی صدر ڈونلڈ ٹرمپ نے دعویٰ کیا تھا کہ ایران نے آبنائے ہرمز میں گشت کرنے والا امریکی فوج کا جدید اپاچی ہیلی کاپٹر مار گرایا ہے، تاہم ایران نے اس الزام کو مسترد کرتے ہوئے کسی بھی قسم کی مداخلت سے انکار کیا تھا۔