ایران نے امریکی فوج کا اپاچی ہیلی کاپٹر مار گرایا، جواب دینا ہوگا: ڈونلڈ ٹرمپ

امریکی صدر ڈونلڈ ٹرمپ نے دعویٰ کیا ہے کہ ایران نے آبنائے ہرمز کے اوپر گشت کرنے والا امریکی فوج کا جدید اپاچی ہیلی کاپٹر مار گرایا ہے۔

اپنے سماجی رابطے کے پلیٹ فارم پر جاری بیان میں ڈونلڈ ٹرمپ نے کہا کہ واقعہ گزشتہ روز پیش آیا، تاہم ہیلی کاپٹر میں سوار دونوں پائلٹس محفوظ رہے اور انہیں کوئی نقصان نہیں پہنچا۔

امریکی صدر کا کہنا تھا کہ اگرچہ جانی نقصان نہیں ہوا، لیکن امریکی فوجی اثاثے کو نشانہ بنایا جانا ایک سنگین معاملہ ہے جس کا جواب دینا ضروری ہوگا۔

انہوں نے مزید کہا کہ امریکا اپنی قومی سلامتی اور فوجی مفادات کے تحفظ کے لیے مناسب اقدامات کرے گا۔

واضح رہے کہ آبنائے ہرمز عالمی تجارت اور توانائی کی ترسیل کے لیے انتہائی اہم سمندری گزرگاہ سمجھی جاتی ہے، جہاں حالیہ عرصے میں کشیدگی میں اضافہ دیکھنے میں آیا ہے۔