نیویارک: اوورسیز کشمیریوں کا عوامی ایکشن کمیٹی سے یکجہتی کا اظہار

امریکا کے شہر بروکلین میں اوورسیز کشمیریوں نے ایک پریس کانفرنس کے دوران آزاد کشمیر کی موجودہ صورتحال پر تشویش کا اظہار کرتے ہوئے احتجاجی تحریک چلانے کا اعلان کر دیا۔

پریس کانفرنس میں مقررین نے کہا کہ اوورسیز کشمیری اقوام متحدہ، پاکستانی قونصل خانے اور انسانی حقوق کی تنظیموں کے دفاتر کے سامنے احتجاجی مظاہرے کریں گے تاکہ عالمی برادری کی توجہ آزاد کشمیر کی صورتحال کی جانب مبذول کرائی جا سکے۔

انہوں نے کہا کہ بیرون ملک مقیم کشمیری عوامی ایکشن کمیٹی کے ساتھ شانہ بشانہ کھڑے ہیں اور کشمیری عوام کے حقوق کے لیے اپنی آواز بلند کرتے رہیں گے۔

مقررین نے آزاد کشمیر میں مبینہ تشدد اور عوامی ایکشن کمیٹی کے ارکان کے خلاف کارروائیوں کی شدید مذمت کرتے ہوئے مطالبہ کیا کہ صورتحال کا فوری نوٹس لیا جائے۔

اوورسیز کشمیری رہنماؤں کا کہنا تھا کہ وہ کشمیری عوام کے جمہوری اور بنیادی حقوق کے تحفظ کے لیے ہر فورم پر آواز اٹھاتے رہیں گے۔