یلو لائن منصوبے میں 6ارب روپے کی مبینہ کرپشن، سندھ حکومت نے تحقیقات شروع کر دیں

کراچی کے اہم عوامی سفری منصوبے بی آر ٹی یلو لائن میں 6 ارب روپے سے زائد کی مبینہ کرپشن سامنے آنے کے بعد سندھ حکومت نے تحقیقات کا آغاز کر دیا ہے۔

ذرائع کے مطابق منصوبے میں مالی بے ضابطگیوں اور قواعد کے خلاف ادائیگیوں کے الزامات سامنے آئے ہیں، جن کی تحقیقات کے لیے چیف سیکرٹری سندھ نے انکوائری کا حکم دیا ہے۔

تحقیقات کے سلسلے میں منصوبے سے وابستہ متعدد افسران کو طلب کیا گیا ہے اور انہیں تمام متعلقہ دستاویزات اور ریکارڈ پیش کرنے کی ہدایت کی گئی ہے۔

صوبائی وزیر ٹرانسپورٹ شرجیل میمن نے کہا کہ حکومت معاملے کی مکمل چھان بین کرے گی اور ذمہ دار عناصر کے خلاف قانون کے مطابق کارروائی عمل میں لائی جائے گی۔

ان کا کہنا تھا کہ سابق پراجیکٹ ڈائریکٹر ضمیر عباسی کی جانب سے قواعد کے برعکس پیشگی ادائیگیوں کے معاملے پر بھی تحقیقات کی جا رہی ہیں۔

سندھ حکومت کے مطابق شفافیت کو یقینی بنانے کے لیے تمام پہلوؤں کا جائزہ لیا جائے گا اور انکوائری رپورٹ کی روشنی میں آئندہ اقدامات کیے جائیں گے۔