بجٹ تاخیر اور معاشی بحران، حکومت پر دباؤ بڑھ گیا: اسد قیصر

اسلام آباد: پاکستان تحریک انصاف کے رہنما اسد قیصر نے حکومت کی کارکردگی پر تنقید کرتے ہوئے کہا ہے کہ توقع تھی کہ بجٹ جمعہ کو پیش کیا جائے گا، تاہم حکومت معاملات سنبھالنے میں ناکام دکھائی دیتی ہے۔

پی ٹی آئی اراکین اسمبلی کے ساتھ پریس کانفرنس میں انہوں نے کہا کہ حکومت اس وقت شدید دباؤ کا شکار ہے، ایک طرف عالمی مالیاتی ادارے اور دوسری جانب اتحادی جماعتوں کے مطالبات ہیں۔

انہوں نے کہا کہ حکومتی پالیسیوں کے باعث عوام، خصوصاً کسان، مزدور اور صنعتکار شدید معاشی مشکلات میں ہیں۔

اسد قیصر نے پنجاب میں گندم کے معاملے پر بھی سوال اٹھایا اور کہا کہ کسان کو اس کی پیداوار کا مناسب فائدہ نہیں دیا جا رہا۔

اس موقع پر تیمور سلیم جھگڑا نے کہا کہ پی ٹی آئی کی جانب سے حکومت کو معاشی اصلاحات اور اخراجات میں کمی کے حوالے سے تجاویز دی گئی تھیں، لیکن ان پر عمل نہیں کیا گیا۔

انہوں نے کہا کہ موجودہ حکومت نہ تو اخراجات کم کرنے میں کامیاب ہے اور نہ ہی ٹیکس چوری روکنے میں مؤثر ثابت ہو رہی ہے۔