سکیورٹی فورسز کا بلوچستان کے ضلع پنجگور میں آپریشن،6 خارجی ہلاک

راولپنڈی/کوئٹہ: سکیورٹی فورسز نے بلوچستان کے ضلع پنجگور میں خفیہ اطلاع پر ایک بڑا اور کامیاب آپریشن کرتے ہوئے بھارتی حمایت یافتہ ‘فتنہ الہندوستان’ کے 6 خارجی دہشت گردوں کو ہلاک کر دیا ہے۔

پاک فوج کے شعبہ تعلقاتِ عامہ (ISPR) کے مطابق، یہ آپریشن پنجگور کے علاقے میں بھارتی سرپرستی میں کام کرنے والے دہشت گردوں کی موجودگی کی مستند اور خفیہ اطلاع پر انتہائی منظم انداز میں کیا گیا۔ آپریشن کے دوران دہشت گردوں کے متعدد خفیہ ٹھکانوں اور پناہ گاہوں پر اچانک چھاپے مارے گئے۔
آئی ایس پی آر نے آپریشن کی تفصیلات شیئر کرتے ہوئے بتایا کہ فائرنگ کے شدید تبادلے کے بعد ٹھکانے کو مکمل طور پر کلیئر کر دیا گیا ہے ہلاک ہونے والے خارجیوں کے قبضے سے بھاری مقدار میں جدید خودکار اسلحہ، گولہ بارود، تیار آئی ای ڈیز (IEDs) اور ایک گاڑی برآمد کر لی گئی ہے۔ سکیورٹی حکام کا کہنا ہے کہ ‘فتنہ الہندوستان’ کے یہ ہلاک شدگان دہشت گرد علاقے میں سکیورٹی فورسز اور معصوم شہریوں پر ہونے والی متعدد کارروائیوں اور تخریب کاری کے واقعات میں براہِ راست ملوث تھے۔
سرکاری بیان میں مزید بتایا گیا ہے کہ پنجگور اور اس کے گردونواح کے علاقوں میں موجود کسی بھی دوسرے بھارتی سرپرستی یافتہ دہشت گرد یا ان کے سہولت کار کے ممکنہ خاتمے کے لیے سکیورٹی فورسز کا وسیع پیمانے پر کلیئرنس آپریشن تاحال جاری ہے۔
(یاد رہے کہ اس سے قبل خیبرپختونخوا میں بھی سکیورٹی فورسز کی مختلف کامیاب کارروائیوں کے دوران 4 خوارج کو جہنم واصل کیا جا چکا ہے
عسکری ذرائع کے مطابق، پاکستان کی سکیورٹی فورسز اور تمام قانون نافذ کرنے والے ادارے وفاقی ایپکس کمیٹی برائے نیشنل ایکشن پلان کے منظور شدہ وژن “عزمِ استحکام” کے تحت ملک بھر میں دہشت گردی کے خلاف اپنی مسلسل مہم کو پوری رفتار اور طاقت کے ساتھ جاری رکھیں گے۔
حکام نے عزم کا اعادہ کیا ہے کہ ارضِ پاک سے بیرونی سرپرستی، فنڈنگ اور حمایت یافتہ دہشت گردی کے اس ناسور کا مکمل، حتمی اور جڑ سے خاتمہ کرنے تک فورسز چین سے نہیں بیٹھیں گی۔