موٹر وے اجتماعی زیادتی کیس: مجرم عابد اور شفقت بگا کی سزا کیخلاف اپیلیں خارج
Web Desk
3 June 2026
لاہور ہائیکورٹ نے لاہور-سیالکوٹ موٹر وے پر خاتون کے ساتھ ہونے والے انتہائی افسوسناک اجتماعی زیادتی (گینگ ریپ) کے مقدمے میں نامزد دو مرکزی مجرموں کی سزاؤں کے خلاف دائر اپیلوں پر حتمی فیصلہ سناتے ہوئے ان کی اپیلیں مکمل طور پر خارج کر دی ہیں۔
عدالتِ عالیہ نے انسدادِ دہشت گردی عدالت (ATC) کی جانب سے دونوں مجرموں کو سنائی جانے والی سزائے موت کے فیصلے کو برقرار رکھا ہے۔ دوسری جانب، پراسکیوٹر جنرل پنجاب سید فرہاد علی شاہ نے اس حساس ترین مقدمے میں عدالت کے روبرو بہترین اور مضبوط کیس پیش کرنے پر اپنی پوری پراسکیوشن ٹیم کی شاندار کارکردگی کو سراہا اور انہیں مبارکباد پیش کی ہے۔
لاہور ہائیکورٹ کے معزز جج جسٹس سید شہباز علی رضوی کی سربراہی میں قائم دو رکنی بنچ نے ان اپیلوں پر تفصیلی سماعت کی. کیس کا پسِ منظر اور وکلا کے دلائل درج ذیل ہیں مقدمے کے مرکزی مجرموں عابد ملہی اور شفقت عرف بگا نے ٹرائل کورٹ (انسدادِ دہشت گردی عدالت) کی جانب سے دی جانے والی سزائے موت کے خلاف ہائیکورٹ میں اپیلیں دائر کر رکھی تھیں۔ سماعت کے دوران مجرموں کے وکیل نے عدالت میں موقف اختیار کیا کہ ٹرائل کورٹ نے مقدمے کے حقائق کا درست طریقے سے جائزہ نہیں لیا اور وہاں ان کا موقف ٹھیک سے نہیں سنا گیا۔ انہوں نے استدعا کی کہ عدالت ٹرائل کورٹ کے سزائے موت کے فیصلے کو کالعدم قرار دے کر مجرموں کو رہا کرنے کا حکم جاری کرے۔سرکار کی جانب سے پراسکیوٹر میڈم راحیلہ شاہد نے مجرموں کی اپیلوں کی شدید مخالفت کی۔ انہوں نے عدالت کو بتایا کہ انسدادِ دہشت گردی عدالت نے تمام قانونی تقاضے پورے کرتے ہوئے بالکل درست فیصلہ دیا ہے اور مجرموں کو میرٹ پر سزائے موت سنائی گئی ہے۔ انہوں نے زور دیا کہ دونوں مجرموں کے خلاف موقع پر سائنسی اور ٹھوس ثبوت موجود ہیں، لہٰذا ان کی اپیلوں کو فوری خارج کیا جائے۔
بعدازاں، بنچ نے دونوں جانب سے تمام دلائل مکمل ہونے پر کیس کا فیصلہ سناتے ہوئے مجرموں کی اپیلیں خارج کرنے اور سزائے موت برقرار رکھنے کا حکم دیا۔
یاد رہے کہ اس لرزہ خیز واقعے نے پورے ملک کو ہلا کر رکھ دیا تھا، جس کے بعد قانون نے تیزی سے حرکت کی انسدادِ دہشت گردی کی خصوصی عدالت نے دونوں مجرموں (عابد ملہی اور شفقت بگا) کو جرم ثابت ہونے پر 20 مارچ 2021 کو سزائے موت کا حکم سنایا تھا۔ دونوں مجرموں نے ٹرائل کورٹ کے اس فیصلے کے محض پانچ دن بعد یعنی 25 مارچ 2021 کو لاہور ہائیکورٹ میں اپیلیں دائر کر کے اسے چیلنج کیا تھا، جو اب طویل قانونی عمل کے بعد خارج کر دی گئی ہیں۔
متعلقہ عنوانات
جے یو آئی رہنماؤں کے خلاف مقدمہ، مفتی ابرار احمد کو وارنٹ کی تعمیل کروا دی
19 November 2026
عالمی و مقامی سطح پر سونے چاندی کی قیمتوں میں کمی
19 November 2026
جنگ کے طریقے تبدیل، مسلح افواج جدید تقاضوں کے مطابق تیار ہیں: نیول چیف
19 November 2026
کوئٹہ: مسافر کوچ اور ایل پی جی باؤزر میں تصادم، خاتون اور بچے سمیت 10 افراد جاں بحق
19 November 2026
پارٹی کیخلاف ہتک آمیز بیانات، مرکزی مسلم لیگ کا عظمیٰ بخاری کو ہرجانے کا نوٹس
19 November 2026
مریم نواز نے سی ایم سولر پینل سکیم فیز ٹو کی منظوری دے دی
19 November 2026
شمالی وزیرستان میں فورسز کا کامیاب سرچ آپریشن، بارودی مواد کا بڑا ٹھکانہ تباہ
19 November 2026
عدالت کا 15 روز میں نادرا ای بیلٹنگ کا عمل مکمل کرنے کا حکم
19 November 2026