اسرائیل کے جنوبی لبنان پر حملے جاری، مزید 4 افراد جاں بحق

بیروت: جنوبی لبنان میں اسرائیلی فوج کی جانب سے وحشیانہ فضائی حملوں کا سلسلہ تھم نہ سکا، جہاں تازہ بمباری کے نتیجے میں مزید 4 افراد جاں بحق اور متعدد زخمی ہو گئے ہیں۔

مقامی ذرائع کے مطابق، یہ ہلاکت خیز فضائی حملہ ضلع صیدا میں واقع قصبے مروانیہ پر کیا گیا۔ اسرائیلی طیاروں کی جانب سے کی جانے والی اس بمباری کے نتیجے میں کم از کم چار افراد موقع پر ہی جاں بحق ہو گئے۔ حملے کے فوراً بعد مقامی امدادی ٹیمیں جائے وقوعہ پر پہنچیں اور ملبے تلے دبے افراد اور متاثرین کو نکالنے کے لیے ریسکیو آپریشن شروع کر دیا۔

لبنان کے دیگر جنوبی علاقوں کو بھی نشانہ بنانے کی اطلاعات موصول ہوئی ہیںضلع صور کے قصبے بازوریہ پر بھی اسرائیلی فضائیہ کی جانب سے ایک الگ حملہ کیا گیا، جس میں تین افراد شدید زخمی ہوئے۔ مروانیہ اور بازوریہ کے متاثرین اور زخمیوں کو فوری طور پر طبی امداد کی فراہمی کے لیے قریبی ہسپتالوں میں منتقل کر دیا گیا ہے، جہاں بعض زخمیوں کی حالت تشویشناک بتائی جاتی ہے۔