کپل شرما شو کے کامیڈی کانٹینٹ پر بشریٰ انصاری کی تنقید

پاکستانی شوبز انڈسٹری کی سینئر اداکارہ بشریٰ انصاری نے بھارتی کامیڈی شو “کپل شرما شو” سمیت اس نوعیت کے دیگر پروگراموں کے مواد پر سخت تنقید کی ہے۔

ایک نجی ٹی وی پروگرام میں گفتگو کرتے ہوئے انہوں نے کہا کہ ایسے شوز میں اکثر اداکار مزاح کے نام پر ٹرانسجینڈر یا خواتین کا روپ دھار کر لوگوں کو ہنسانے کی کوشش کرتے ہیں، جس پر انہیں اب شدید تحفظات ہیں۔

بشریٰ انصاری نے سوال اٹھایا کہ کیا کسی صنف کا روپ دھار کر غیر سنجیدہ یا غیر مناسب انداز میں گفتگو کرنا واقعی کامیڈی کہلاتا ہے؟ ان کے مطابق اس طرز کے مواد کو بار بار دکھانا ناظرین کے ذوق پر اثر انداز ہو سکتا ہے۔

اداکارہ نے کہا کہ ایک یا دو بار اس قسم کا مواد قابلِ برداشت ہو سکتا ہے، لیکن مسلسل اسی طرز کی کامیڈی پیش کرنا مناسب نہیں۔

انہوں نے مزید کہا کہ اگر سینئر اداکارائیں اسکرین پر مردانہ روپ اختیار کر کے غیر سنجیدہ مزاح کریں تو کیا ناظرین اسے قبول کریں گے۔