حجاج کی وطن واپسی کا آغاز، لاہور کے لیے پہلی پرواز 159 حجاج کو لے کر پہنچ گئی

لاہور: پی آئی اے نے بعد از حج آپریشن کا آغاز کر دیا ہے جس کے تحت حجاج کرام کی وطن واپسی کا سلسلہ شروع ہو گیا ہے۔

لاہور کے لیے پہلی حج پرواز جدہ سے حجاج کرام کو لے کر پہنچ گئی۔ پرواز پی کے 732 کے ذریعے 159 حجاج کرام کو لاہور ایئرپورٹ پر اتارا گیا۔

ایئرپورٹ پر پی آئی اے کے افسران نے حجاج کرام کا استقبال کیا اور انہیں ہار پہنائے۔

ترجمان کے مطابق بعد از حج آپریشن 30 جون تک جاری رہے گا جس کے دوران جدہ اور مدینہ منورہ سے مختلف شہروں کے لیے پروازیں آپریٹ کی جائیں گی جن میں اسلام آباد، لاہور، کراچی، فیصل آباد، ملتان، سیالکوٹ اور کوئٹہ شامل ہیں۔

پی آئی اے اس آپریشن کے دوران مجموعی طور پر 213 پروازیں چلائے گی جن کے ذریعے 53 ہزار سے زائد حجاج کرام کو وطن واپس لایا جائے گا۔

حکام کے مطابق حجاج کرام کی سہولت کے لیے تمام انتظامات مکمل کر لیے گئے ہیں جبکہ آپریشن کی نگرانی سی ای او خود کر رہے ہیں۔