وزیراعلیٰ خیبرپختونخوا کا گلگت بلتستان کے انتخابات میں شفافیت کیلئے چیف جسٹس سپریم اپیلیٹ کورٹ گلگت بلتستان کو خط ارسال
Web Desk
30 May 2026
پشاور/گلگت: خیبرپختونخوا کے وزیراعلیٰ محمد سہیل خان آفریدی نے گلگت بلتستان میں آئندہ ہونے والے عام انتخابات کے انعقاد اور شفافیت کے حوالے سے پیدا ہوالی سنگین صورتحال پر شدید تشویش کا اظہار کرتے ہوئے سپریم اپیلیٹ کورٹ گلگت بلتستان کے چیف جسٹس کو ایک باضابطہ اور ہنگامی خط ارسال کیا ہے، جس میں معاملے پر فوری عدالتی مداخلت کی درخواست کی گئی ہے۔
وزیراعلیٰ خیبرپختونخوا نے اپنے خط میں گلگت بلتستان کے موجودہ سیاسی و انتخابی ماحول کو انتہائی تشویشناک قرار دیتے ہوئے مؤقف اختیار کیا ہے کہ وہاں ایک مخصوص سیاسی جماعت کو نشانہ بنایا جا رہا ہے۔ انہوں نے کہا کہ موصولہ اطلاعات کے مطابق مذکورہ جماعت کو انتخابی سرگرمیوں، عوامی اجتماعات، کارنر میٹنگز، انتخابی مہم اور پارٹی قیادت سمیت کارکنان کی نقل و حرکت میں غیر ضروری اور غیر قانونی رکاوٹوں کا سامنا ہے۔
وزیراعلیٰ محمد سہیل آفریدی نے خط میں انتظامیہ کی یکطرفہ کارروائیوں کی نشاندہی کرتے ہوئے لکھا ہے کہ سیاسی کارکنوں کو ہراساں کرنے، غیر قانونی طور پر گرفتار کرنے اور پرامن سیاسی سرگرمیوں کو روکنے کی مسلسل اطلاعات سامنے آ رہی ہیں۔ انہوں نے خبردار کیا کہ اگر ان سلینگین اقدامات کو فوری طور پر نہ روکا گیا تو پورے انتخابی عمل کی ساکھ، شفافیت اور غیر جانبداری کو شدید اور ناقابلِ تلافی نقصان پہنچ سکتا ہے۔
انہوں نے واضح کیا کہ اسلامی جمہوریہ پاکستان کا آئین ہر شہری اور تمام سیاسی جماعتوں کو آزاد، منصفانہ، شفاف اور غیر جانبدارانہ انتخابی عمل میں حصہ لینے کا بنیادی اور جمہوری حق دیتا ہے۔ ان آئینی اصولوں سے انحراف نہ صرف ملکی آئین کی کھلی خلاف ورزی ہے بلکہ یہ بنیادی جمہوری اقدار کے بھی یکسر منافی ہے۔
وزیراعلیٰ خیبرپختونخوا نے سپریم اپیلیٹ کورٹ کے چیف جسٹس سے خط کے ذریعے درج ذیل اہم اقدامات اٹھانے کی گزارش کی ہے:
-
اداروں کو واضح ہدایات: گلگت بلتستان میں انتخابات کے آزاد، منصفانہ اور غیر جانبدارانہ انعقاد کو یقینی بنانے کے لیے تمام متعلقہ انتظامی و قانون نافذ کرنے والے اداروں کو سخت اور واضح ہدایات جاری کی جائیں۔
-
ہراسانی کا خاتمہ: سیاسی کارکنوں اور جماعتی قیادت کے خلاف جاری غیر قانونی ہراسانی، بلاجواز گرفتاریوں اور نقل و حرکت پر لگی پابندیوں کو فوری طور پر کالعدم قرار دیا جائے۔
-
لیول پلے فیلڈ کی فراہمی: تمام سیاسی جماعتوں کو بغیر کسی امتیاز یا تفریق کے اپنی انتخابی مہم اور سیاسی و آئینی سرگرمیاں جاری رکھنے کا مکمل اور مساوی حق دیا جائے۔
-
فوری مؤثر کارروائی: انتخابی عمل کے دوران بنیادی آئینی اور جمہوری حقوق کی کسی بھی قسم کی خلاف ورزی کے خلاف عدالت اپنے اختیارات استعمال کرتے ہوئے فوری کارروائی کرے۔
وزیراعلیٰ محمد سہیل آفریدی نے عدالتِ عالیہ سے اپیل کی ہے کہ وہ قانون کی حکمرانی، جمہوری اقدار کے تحفظ اور عوام کے انتخابی عمل پر اعتماد کو بحال رکھنے کے لیے اپنے آئینی اختیارات کا بروقت استعمال کرے۔ انہوں نے امید ظاہر کی کہ عدلیہ کی یہ مداخلت گلگت بلتستان کے عوام کے حقِ رائے دہی کا تحفظ کرے گی۔
واضح رہے کہ معاملے کی حساسیت کے پیشِ نظر اس خط کی ایک باضابطہ نقل (Copy) چیف جسٹس آف پاکستان جسٹس یحییٰ آفریدی کو بھی ضروری کارروائی کے لیے ارسال کر دی گئی ہے۔
متعلقہ عنوانات
جے یو آئی رہنماؤں کے خلاف مقدمہ، مفتی ابرار احمد کو وارنٹ کی تعمیل کروا دی
19 November 2026
عالمی و مقامی سطح پر سونے چاندی کی قیمتوں میں کمی
19 November 2026
جنگ کے طریقے تبدیل، مسلح افواج جدید تقاضوں کے مطابق تیار ہیں: نیول چیف
19 November 2026
کوئٹہ: مسافر کوچ اور ایل پی جی باؤزر میں تصادم، خاتون اور بچے سمیت 10 افراد جاں بحق
19 November 2026
پارٹی کیخلاف ہتک آمیز بیانات، مرکزی مسلم لیگ کا عظمیٰ بخاری کو ہرجانے کا نوٹس
19 November 2026
مریم نواز نے سی ایم سولر پینل سکیم فیز ٹو کی منظوری دے دی
19 November 2026
شمالی وزیرستان میں فورسز کا کامیاب سرچ آپریشن، بارودی مواد کا بڑا ٹھکانہ تباہ
19 November 2026
عدالت کا 15 روز میں نادرا ای بیلٹنگ کا عمل مکمل کرنے کا حکم
19 November 2026