میئر نیویارک زہران ممدانی کا اسرائیل ڈے پریڈ میں شرکت سے انکار

نیویارک کے میئر زہران ممدانی نے اسرائیل ڈے پریڈ میں شرکت نہ کرنے کا فیصلہ برقرار رکھتے ہوئے کہا ہے کہ وہ پہلے ہی اپنے سیاسی مؤقف کو واضح کرچکے ہیں۔

امریکی میڈیا کے مطابق اتوار کو ہونے والی سالانہ اسرائیل ڈے پریڈ میں ہزاروں افراد شریک ہوں گے، تاہم کئی دہائیوں میں پہلی بار نیویارک کا میئر اس تقریب کا حصہ نہیں بنے گا۔

میئر زہران ممدانی نے کہا کہ وہ انتخابی مہم کے دوران ہی اعلان کرچکے تھے کہ اسرائیلی حکومت کی پالیسیوں کے باعث وہ پریڈ میں شریک نہیں ہوں گے، تاہم شہر کے تمام شہریوں کی سلامتی ان کی اولین ترجیح رہے گی۔

انہوں نے سات اکتوبر کے واقعات کی مذمت کرتے ہوئے غزہ میں اسرائیلی کارروائیوں کو فلسطینیوں کے خلاف نسل کشی قرار دیا تھا۔

رپورٹ کے مطابق اسرائیل ڈے پریڈ باسٹھ برس سے نیویارک کی اہم روایت سمجھی جاتی ہے اور ماضی میں تمام میئرز اس میں شریک ہوتے رہے ہیں۔

ادھر نیویارک کے مذہبی رہنما ربی جو پوتاسنک نے میئر کے فیصلے پر افسوس کا اظہار کرتے ہوئے کہا کہ شہر کے سربراہ کو مختلف خیالات رکھنے والے تمام طبقات کے ساتھ کھڑا ہونا چاہیے تھا۔

میڈیا رپورٹس کے مطابق میئر زہران ممدانی نے حالیہ مہینوں میں یہودی برادری کے ساتھ روابط بڑھانے کی کوشش کی، تاہم فلسطین کے حق میں ان کا مؤقف بدستور برقرار ہے۔