امریکی صدر ٹرمپ کا پاکستانی اور خلیجی قیادت سے رابطہ، ایران معاہدہ جلد متوقع

امریکی صدر ڈونلڈ ٹرمپ نے پاکستان سمیت متعدد مسلم ممالک کی قیادت سے ٹیلیفونک رابطے کرتے ہوئے ایران سے متعلق جاری مذاکرات اور ممکنہ معاہدے پر تفصیلی گفتگو کی ہے۔

ڈونلڈ ٹرمپ نے اپنے بیان میں کہا کہ انہوں نے پاکستان کے فیلڈ مارشل سید عاصم منیر، سعودی ولی عہد محمد بن سلمان، اماراتی صدر محمد بن زاید، امیرِ قطر شیخ تمیم بن حمد الثانی، قطری وزیراعظم محمد بن عبدالرحمن، ترک صدر رجب طیب اردوان اور مصری صدر عبدالفتاح السیسی سے گفتگو کی۔

امریکی صدر کے مطابق ایران سے متعلق مفاہمتی یادداشت پر اہم پیش رفت ہوئی ہے اور معاہدے کے بیشتر نکات پر مذاکرات مکمل ہو چکے ہیں۔

انہوں نے بتایا کہ اسرائیلی وزیراعظم بنیامین نیتن یاہو سے بھی رابطہ ہوا، جبکہ معاہدے کی آخری تفصیلات زیر غور ہیں جن کا اعلان جلد متوقع ہے۔

ڈونلڈ ٹرمپ کا کہنا تھا کہ ایران معاہدے کے بعد آبنائے ہرمز کو بھی کھول دیا جائے گا، جبکہ خطے میں امن و استحکام کے لیے مختلف ممالک کے ساتھ مسلسل رابطے جاری ہیں۔

غیرملکی ذرائع ابلاغ کے مطابق امریکا اور ایران کے درمیان براہ راست مذاکرات دوبارہ بحال ہونے کا امکان ہے، جبکہ اسلام آباد بھی سفارتی سرگرمیوں کے اہم مرکز کے طور پر سامنے آ رہا ہے۔