امریکی صدر ٹرمپ کا ایران جنگ تیزی سے ختم کرنے کا اعلان

واشنگٹن: امریکی صدر ڈونلڈ ٹرمپ نے ایران پر ممکنہ حملہ عارضی طور پر مؤخر کرنے کے بعد ایک اہم ترین اجلاس کی صدارت کی، جس کے بعد انہوں نے ایران کے ساتھ جاری جنگ کو انتہائی تیزی سے ختم کرنے کا بڑا اعلان کر دیا ہے۔

امریکی میڈیا رپورٹس کے مطابق، صدر ٹرمپ نے وائٹ ہاؤس میں اپنی قومی سلامتی کی ٹیم (نیشنل سیکیورٹی ٹیم) کے ساتھ ایک ہنگامی اور اہم میٹنگ کی زیرِ صدارت کی۔ اس ہائی لیول اجلاس میں امریکی نائب صدر، وزیرِ خارجہ، وزیرِ دفاع اور پینٹاگون کے اعلیٰ فوجی حکام نے شرکت کی۔ اجلاس کے دوران ایران کے ساتھ جنگی صورتحال، مستقبل کی حکمتِ عملی اور مختلف فوجی آپریشنز کے ساتھ ساتھ سفارتی کوششوں کا بھی تفصیلی جائزہ لیا گیا اور متعدد آپشنز پر غور کیا گیا۔

اس اہم ترین بیٹھک کے بعد میڈیا سے گفتگو کرتے ہوئے امریکی صدر ڈونلڈ ٹرمپ نے دعویٰ کیا کہ “ایران کے حوالے سے اب مثبت پیشرفت ہوئی ہے، جس کے بعد ہم اس جنگ کو بہت تیزی سے ختم کر دیں گے”۔ تاہم، انہوں نے اپنے سخت مؤقف کو دہراتے ہوئے واضح کیا کہ امریکہ کسی بھی صورت ایران کو ایٹمی ہتھیار رکھنے کی اجازت نہیں دے گا۔ صدر ٹرمپ نے مزید دعویٰ کیا کہ جاری فوجی کارروائیوں کے نتیجے میں ایران کی نیوی (بحریہ)، فضائیہ، روایتی فوج اور ان کی مرکزی قیادت کو مکمل طور پر ختم کیا جا چکا ہے۔