شمالی امریکا کا سب سے بڑا مسافر ریل نظام ہڑتال کے باعث بند، لاکھوں مسافر پریشان

شمالی امریکا کا سب سے بڑا روزانہ مسافروں کو سفر کی سہولت فراہم کرنے والا ریل نظام مزدوروں کی ہڑتال کے باعث مکمل طور پر بند ہو گیا، جس کے بعد لاکھوں شہریوں کو شدید سفری مشکلات کا سامنا ہے۔

نیویارک اور اس کے مشرقی مضافاتی علاقوں کو ملانے والی لانگ آئی لینڈ ریل روڈ کی سروس ہفتہ کی رات 12 بجے کے بعد معطل کر دی گئی، جب 5 مزدور تنظیموں سے وابستہ ملازمین نے 3 دہائیوں بعد پہلی بار کام چھوڑ دیا۔

ریلوے انتظامیہ اور مزدور تنظیموں کے درمیان کئی ماہ سے نئے معاہدے پر مذاکرات جاری تھے، تاہم تنخواہوں اور طبی اخراجات سے متعلق معاملات پر اتفاق نہ ہو سکا۔

مزدور رہنما کیون سیکسٹن کا کہنا ہے کہ فریقین کے درمیان اختلافات اب بھی بہت زیادہ ہیں اور فی الحال مزید مذاکرات طے نہیں پا سکے۔

دوسری جانب میٹروپولیٹن ٹرانسپورٹ اتھارٹی کے سربراہ جینو لیبر نے دعویٰ کیا کہ انتظامیہ نے تنخواہوں سے متعلق یونین کے مطالبات تسلیم کیے، مگر اس کے باوجود مزدور پہلے ہی ہڑتال کا فیصلہ کر چکے تھے۔

یہ ہڑتال 1994 کے بعد لانگ آئی لینڈ ریل روڈ کی پہلی بڑی ہڑتال ہے، جس کے باعث نیویارک میں کھیلوں کے مقابلے دیکھنے والے شائقین اور روزانہ سفر کرنے والے لاکھوں افراد شدید متاثر ہو سکتے ہیں۔

ریلوے اسٹیشنوں پر معمول کا رش ختم ہو گیا جبکہ پلیٹ فارم بند کر دیے گئے اور مسافروں کو متبادل سفری ذرائع استعمال کرنے کی ہدایت کی گئی۔

اگر ہڑتال ورکنگ دنوں تک جاری رہی تو روزانہ سفر کرنے والے تقریباً ڈھائی لاکھ افراد کو شدید مشکلات پیش آئیں گی اور شاہراہوں پر ٹریفک کا دباؤ مزید بڑھ سکتا ہے۔

نیویارک کی گورنر کیتھی ہوکل نے ہڑتال کی ذمہ داری سابق امریکی صدر ڈونلڈ ٹرمپ کی انتظامیہ پر عائد کی، جبکہ ٹرمپ نے ان الزامات کو مسترد کرتے ہوئے معاملے کو ریاستی حکومت کی ناکامی قرار دیا۔

مزدور تنظیموں کا مؤقف ہے کہ مہنگائی اور بڑھتی ہوئی زندگی کے اخراجات کے باعث ملازمین کیلئے بہتر تنخواہیں ناگزیر ہیں۔