امریکی فوج نے مالٹا پرچم بردار ٹینکر کو آبنائے ہرمز پار کرنے سے روک دیا

امریکی سینٹرل کمانڈ (سینٹ کام) نے آبنائے ہرمز میں ایک بڑی کارروائی کرتے ہوئے مالٹا کا پرچم بردار ٹینکر روک لیا ہے۔ سینٹ کام کے ترجمان نے عرب میڈیا سے گفتگو کرتے ہوئے تصدیق کی کہ ‘ایجیوس فانوریوس’ نامی ٹینکر کو ناکہ بندی کی خلاف ورزی کرنے پر روکا گیا، تاہم انہوں نے واضح کیا کہ یہ ٹینکر ایرانی تیل کی ترسیل میں ملوث نہیں تھا۔ ترجمان کا مزید کہنا تھا کہ حالیہ دنوں میں ایسے متعدد ٹینکرز کو روکا گیا ہے جو ایرانی تیل تو نہیں لے جا رہے تھے لیکن انہوں نے سمندری ناکہ بندی کے ضوابط کی خلاف ورزی کی تھی۔

امریکی حکام نے اس عزم کا اعادہ کیا ہے کہ ایرانی بندرگاہوں پر امریکی ناکہ بندی کا سلسلہ بدستور سختی سے جاری ہے۔ ترجمان کے مطابق ان اقدامات کا مقصد خطے میں مقررہ پابندیوں اور سیکیورٹی پروٹوکولز پر عملدرآمد کو یقینی بنانا ہے۔ واضح رہے کہ آبنائے ہرمز عالمی تیل کی تجارت کے لیے ایک حساس اور اہم ترین گزرگاہ ہے، جہاں امریکی فوج کی جانب سے ناکہ بندی کے باعث تناؤ کی صورتحال برقرار ہے۔