ایران معاملے پر چین کی مدد درکار نہیں، صدر ٹرمپ بیجنگ کے لیے روانہ ہوگئے

امریکی صدر ڈونلڈ ٹرمپ اعلیٰ سطحی وفد کے ہمراہ چین کے اہم دورے پر روانہ ہوگئے جہاں وہ چینی صدر شی جن پنگ سے مشرقِ وسطیٰ کی صورتحال، ایران تنازع، عالمی تجارت اور آبنائے ہرمز کے بحران سمیت مختلف اہم امور پر بات چیت کریں گے۔

عالمی خبر رساں اداروں کے مطابق صدر ٹرمپ کے ہمراہ امریکی وزیر خارجہ مارکو روبیو، وزیر دفاع پیٹ ہیگستھ، امریکی تجارتی نمائندہ جیمی سن گریئر، وائٹ ہاؤس کے نائب چیف آف اسٹاف اسٹیفن ملر اور جیمس بلیئر بھی موجود ہیں۔

وفد میں صدر ٹرمپ کے بیٹے ایرک ٹرمپ اور ان کی اہلیہ کے علاوہ سائنس مشیر مائیکل کریٹسیوس اور چیف آف پروٹوکول مونیکا کراولی بھی شامل ہیں۔

روانگی سے قبل صحافیوں سے گفتگو کرتے ہوئے ڈونلڈ ٹرمپ نے کہا کہ ایران کے معاملے میں امریکا کو کسی کی مدد کی ضرورت نہیں۔ ان کا کہنا تھا کہ یہ معاملہ یا تو امن معاہدے کے ذریعے حل ہوگا یا پھر کسی اور طریقے سے امریکا کامیابی حاصل کرے گا۔

امریکی صدر نے مزید کہا کہ چینی صدر کے ساتھ گفتگو کے لیے کئی اہم موضوعات موجود ہیں، تاہم ان کے مطابق ایران اس فہرست میں سب سے اہم معاملہ نہیں کیونکہ ایران کی صورتحال امریکا کے مکمل کنٹرول میں ہے۔

دوسری جانب امریکی حکام چین پر زور دے رہے ہیں کہ وہ ایران اور خلیجی صورتحال میں مؤثر کردار ادا کرے اور آبنائے ہرمز کی بحالی میں مدد فراہم کرے۔