امریکہ ایران کشیدگی کے معاشی اثرات نمایاں، ترسیلاتِ زر میں کمی ریکارڈ

مشرقِ وسطیٰ میں بڑھتی ہوئی امریکہ اور ایران کشیدگی کے اثرات پاکستان کی معیشت پر بھی ظاہر ہونا شروع ہو گئے ہیں۔ اپریل کے دوران بیرونِ ملک مقیم پاکستانیوں کی جانب سے بھیجی جانے والی ترسیلاتِ زر میں نمایاں کمی ریکارڈ کی گئی ہے۔

اعداد و شمار کے مطابق، مارچ کے مقابلے میں اپریل میں ترسیلاتِ زر میں مجموعی طور پر 8 فیصد کمی ہوئی ہے۔ اپریل کے دوران ترسیلاتِ زر کا حجم 3 ارب 53 کروڑ 90 لاکھ ڈالر رہا، جبکہ مارچ میں یہ 3 ارب 83 کروڑ 10 لاکھ ڈالر تھا۔ سب سے زیادہ کمی متحدہ عرب امارات (یو اے ای) سے آنے والی رقوم میں دیکھی گئی، جہاں 11 فیصد کمی کے بعد حجم 73 کروڑ 50 لاکھ ڈالر رہ گیا، جو مارچ میں 83 کروڑ ڈالر تھا۔

سعودی عرب سے بھی ترسیلاتِ زر میں 8 فیصد کمی ریکارڈ کی گئی اور اپریل میں وہاں سے 84 کروڑ 20 لاکھ ڈالر موصول ہوئے۔ اسی طرح امریکہ سے آنے والی ترسیلاتِ زر میں بھی 11 فیصد کمی سامنے آئی ہے، جہاں سے اپریل میں 31 کروڑ 80 لاکھ ڈالر موصول ہوئے۔ ماہرینِ معیشت کا کہنا ہے کہ خطے میں غیر یقینی کی صورتحال اور جغرافیائی سیاسی کشیدگی بیرونِ ملک مقیم پاکستانیوں کے معاشی فیصلوں پر اثر انداز ہو رہی ہے۔