ایران کا جوہری پروگرام کسی بھی وقت قبضے میں لے سکتے ہیں: ٹرمپ

امریکی صدر ڈونلڈ ٹرمپ نے ایران کے جوہری پروگرام پر انتہائی سخت موقف اختیار کرتے ہوئے کہا ہے کہ امریکی فوج ایرانی افزودہ یورینیم کی کڑی نگرانی کر رہی ہے اور ضرورت پڑنے پر اسے کسی بھی وقت اپنے قبضے میں لیا جا سکتا ہے۔ شیریل ایٹکسن کو دیے گئے ایک انٹرویو میں صدر ٹرمپ نے دعویٰ کیا کہ اگر کوئی بھی افزودہ یورینیم کے ذخیرے کے قریب گیا تو امریکہ کو فوری علم ہو جائے گا اور اسے نشانہ بنایا جائے گا۔

صدر ٹرمپ کا کہنا تھا کہ ایران کو عسکری طور پر شکست دی جا چکی ہے، تاہم کارروائیاں ابھی مکمل طور پر ختم نہیں ہوئیں۔ انہوں نے دعویٰ کیا کہ ایرانی قیادت کی ‘اے’ اور ‘بی’ ٹیمیں مکمل طور پر ختم کر دی گئی ہیں جبکہ ‘سی’ ٹیم کا بھی کچھ حصہ ختم ہو چکا ہے۔ انہوں نے مزید کہا کہ ایران ایک غیر ذمہ دار ملک ہے جو معاہدے توڑ دیتا ہے، اس لیے اسے کسی صورت جوہری ہتھیار حاصل کرنے کی اجازت نہیں دی جا سکتی۔

آبنائے ہرمز کے حوالے سے بات کرتے ہوئے امریکی صدر نے کہا کہ امریکہ کو اس گزرگاہ کی ذاتی طور پر ضرورت نہیں، بلکہ وہ یہ سب مشرقِ وسطیٰ میں موجود اپنے اتحادیوں کے لیے کر رہا ہے۔

قبل ازیں، صدر ٹرمپ نے سوشل میڈیا پلیٹ فارم ‘ٹروتھ سوشل’ پر ایران کی جانب سے امن تجویز پر دیے گئے جواب کو “مکمل طور پر ناقابل قبول” قرار دے کر مسترد کر دیا تھا۔ واضح رہے کہ ایرانی میڈیا کے مطابق تہران کا یہ جواب ثالث کا کردار ادا کرنے والے ملک پاکستان کے ذریعے واشنگٹن تک پہنچایا گیا تھا۔