آبنائے ہرمز کے قریب چینی ملکیت کے تیل بردار جہاز پر حملہ، آگ بھڑک اٹھی

بحیرہ عرب: آبنائے ہرمز کے قریب پیر کے روز ایک چینی ملکیت کے تیل بردار بحری جہاز پر حملہ کیا گیا جس کے نتیجے میں جہاز کے ڈیک پر آگ لگ گئی۔

چینی میڈیا کے مطابق یہ پہلا موقع ہے کہ کسی چینی ملکیت اور عملے والے تیل بردار بحری جہاز کو نشانہ بنایا گیا ہے۔ حملے کے وقت جہاز پر آگ بھڑکنے کی اطلاع موصول ہوئی، تاہم عملے کے زخمی ہونے کی فوری طور پر کوئی تصدیق سامنے نہیں آ سکی۔

بحری سیکیورٹی ذرائع کے مطابق متاثرہ بحری جہاز ممکنہ طور پر ایک تیل و کیمیکل بردار ٹینکر تھا جو مارشل آئی لینڈز کے پرچم تلے رجسٹرڈ تھا۔ واقعہ متحدہ عرب امارات کے قریب واقع صقر بندرگاہ کے اطراف پیش آیا۔

ابتدائی معلومات کے مطابق حملے کے بعد آگ پر قابو پانے کی کوششیں شروع کر دی گئیں جبکہ واقعے کی نوعیت اور ذمہ دار عناصر کے حوالے سے تحقیقات جاری ہیں۔