ہمیں ایران کے ساتھ خراب معاہدے پر مجبورنہیں کیاجاسکتا، امریکی محکمہ خارجہ

امریکی محکمہ خارجہ کے ترجمان ٹومی پگوٹ نے کہا ہے کہ امریکا ایران کے ساتھ کسی بھی معاہدے میں جلد بازی نہیں کرے گا ۔ کوئی بھی واشنگٹن کوخراب معاہدے پر مجبورنہیں کرسکتا۔

عرب میڈیا سے گفتگو کرتے ہوئے ٹومی پگوٹ نے کہا کہ امریکی صدرنے واضح طور پر سفارتی راستے کو ترجیح دینے کا اعلان کیا ہے، تاہم  صرف ایسا معاہدہ قبول کریں گےجو امریکی مفادات کے مطابق ہو۔

انہوں نے کہا کہ صدر ٹرمپ امریکی عوام کے لیے اچھی ڈیل کرنا چاہتے ہیں اور ان کا مؤقف بالکل واضح ہے کہ ایران کو کسی صورت جوہری ہتھیار حاصل کرنے کی اجازت نہیں دی جا سکتی۔

ترجمان امریکی محکمہ خارجہ کا کہنا تھا کہ واشنگٹن ایران کے ساتھ جاری مذاکرات اور خطے کی صورتحال پر مسلسل نظر رکھے ہوئے ہے۔