برلن عجائب گھر میں مشہور شخصیات کے چہروں والے روبوٹ کی انوکھی نمائش

برلن: جرمنی کے دارالحکومت برلن کے معروف عجائب گھر میں امریکی فنکار بیپل کی منفرد نمائش نے شہریوں اور سیاحوں کی توجہ حاصل کرلی۔

نمائش میں ایسے روبوٹ کتوں کو پیش کیا گیا ہے جن کے سروں پر دنیا کی مشہور شخصیات سے مشابہ نہایت حقیقی چہرے نصب کیے گئے ہیں۔ ان شخصیات میں ایلون مسک، مارک زکربرگ، جیف بیزوس، اینڈی وارہول اور پابلو پکاسو شامل ہیں۔

یہ روبوٹ عجائب گھر کے اندر گھومتے پھرتے ہیں اور اپنے اندر نصب کیمروں کے ذریعے اردگرد کے مناظر محفوظ کرتے ہیں۔ بعد ازاں وہ ان تصاویر کو مصنوعی ذہانت کی مدد سے مختلف انداز میں تبدیل کرکے پرنٹ بھی کرتے ہیں۔

منتظمین کے مطابق یہ فن پارہ اس بات کی عکاسی کرتا ہے کہ جدید دور میں انسان کی سوچ، پسند اور دنیا کو دیکھنے کا انداز ٹیکنالوجی اور خودکار نظاموں سے کس طرح متاثر ہو رہا ہے۔

نمائش کے منتظمین کا کہنا ہے کہ عجائب گھر معاشرے میں آنے والی بڑی تبدیلیوں پر غور و فکر کے اہم مراکز ہوتے ہیں، اسی لیے اس منفرد منصوبے کو عوام کے سامنے پیش کیا گیا ہے۔