امریکا نے ایران کے 35 اداروں اور شخصیات پر پابندیاں عائد کر دیں

امریکا نے ایران کے خلاف اقتصادی دباؤ میں اضافہ کرتے ہوئے مزید 35 اداروں اور شخصیات کو پابندیوں کی فہرست میں شامل کر لیا ہے۔ امریکی حکام کے مطابق یہ نیٹ ورک ایران کے بینکاری نظام اور تیل کی تجارت کو سہارا دے کر عالمی پابندیوں کو بائی پاس کرنے میں ملوث تھا۔ امریکی محکمہ خزانہ کے ذیلی ادارے ‘او ایف اے سی’ (OFAC) نے خبردار کیا ہے کہ اربوں ڈالر مالیت کے ایرانی تیل کی ترسیل اور مالی لین دین میں ملوث کمپنیوں کے علاوہ وہ بینک بھی کارروائی کی زد میں آ سکتے ہیں جو ان سے کاروبار جاری رکھیں گے۔ رپورٹ میں خاص طور پر چین کے صوبے شینڈونگ میں قائم نجی آئل ریفائنریز کا حوالہ دیا گیا ہے جو ایرانی تیل کی درآمد اور ریفائننگ میں اہم کردار ادا کر رہی ہیں۔ ان پابندیوں کا مقصد آبنائے ہرمز کے ذریعے ہونے والے ادائیگیوں کے نظام اور ایرانی مالیاتی ذرائع کو روکنا ہے۔