پاکستان کرپٹو کونسل کا ایکسچینج کمپنیوں کو کرپٹو لائسنس جاری کرنے کا عندیہ

پاکستان کرپٹو کونسل کے سی ای او بلال ثاقب نے ایکسچینج ایسوسی ایشن آف پاکستان کو کرپٹو لائسنس جاری کرنے کا عندیہ دے دیا ہے۔ ایکسچینج ایسوسی ایشن کے چیئرمین ملک بوستان اور ظفر پراچہ کے ہمراہ ہونے والے اجلاس میں بتایا گیا کہ اگر کرپٹو کرنسی کو ایک مستحکم ڈیجیٹل کرنسی کے طور پر اپنایا گیا تو اوورسیز پاکستانیوں کی ترسیلاتِ زر کا حجم 38 ارب ڈالر سے بڑھ کر 50 ارب ڈالر سالانہ تک پہنچ سکتا ہے۔ اجلاس میں انکشاف کیا گیا کہ اسٹیٹ بینک اور ایس ای سی پی نے اب کونسل کی این او سی (NOC) سے مشروط بینکوں میں کرپٹو اکاؤنٹس کھولنے کی اجازت دے دی ہے۔ اس وقت تقریباً 4 کروڑ پاکستانی 6 فیصد لاگت پر کرپٹو ٹریڈنگ کر رہے ہیں، تاہم ڈیجیٹل لائسنس کے اجرا کے بعد یہ لاگت کم ہو کر صرف ایک فیصد رہ جائے گی، جس سے ملک میں ڈیجیٹل معیشت کو فروغ ملے گا۔