واشنگٹن فائرنگ کیس، ملزم پر امریکی صدر ڈونلڈ ٹرمپ کو قتل کرنے کی کوشش کا الزام عائد

واشنگٹن میں پیش آنے والے فائرنگ اور پریس ڈنر واقعے کے ملزم پر امریکی صدر ڈونلڈ ٹرمپ کو قتل کرنے کی کوشش کا باضابطہ الزام عائد کر دیا گیا ہے۔

خبر ایجنسی کے مطابق ملزم کے خلاف تین مختلف الزامات پر مشتمل شکایت دائر کی گئی ہے جن میں اسلحہ سے متعلق سنگین الزامات بھی شامل ہیں۔

امریکی عدالت نے ملزم کو عارضی طور پر حراست میں رکھنے کا حکم جاری کیا ہے جبکہ کیس کی مزید سماعت جمعرات کے روز مقرر کی گئی ہے۔

دوسری جانب وائٹ ہاؤس کی ترجمان کیرولین لیوئٹ نے پریس بریفنگ میں بتایا کہ صدر کی سیکیورٹی کو مزید سخت بنانے کے لیے اقدامات کیے جا رہے ہیں اور قومی سلامتی کے لیے اضافی حفاظتی انتظامات ضروری ہیں۔

انہوں نے کہا کہ صدر ٹرمپ کے مطابق پریس ڈنر میں سیکیورٹی مناسب تھی تاہم مزید بہتری کے لیے محکمہ ہوم لینڈ سیکیورٹی اور وائٹ ہاؤس حکام کے درمیان ملاقات طے ہے۔

امریکی قائم مقام اٹارنی جنرل کے مطابق ملزم تفتیش میں تعاون نہیں کر رہا جبکہ اس بات کی بھی تحقیقات جاری ہیں کہ آیا واقعے کا کسی بیرونی ملک سے کوئی تعلق ہے یا نہیں۔