پاکستان کا ایران کو تجارتی سہولت دینے کا بڑا فیصلہ، ٹرانزٹ تجارت کی اجازت

پاکستان نے ایران کو تجارت میں اہم سہولت فراہم کرنے کا فیصلہ کرتے ہوئے اپنے راستے کسی تیسرے ملک کے لیے سامان کی ترسیل کی اجازت دے دی ہے۔

وزارت تجارت کی جانب سے پاکستان کے ذریعے سامان کی ٹرانزٹ نقل و حمل سے متعلق حکم نامہ دو ہزار چھبیس جاری کردیا گیا ہے، جو فوری طور پر نافذ العمل ہوگا۔

نوٹیفکیشن کے مطابق وفاقی حکومت نے درآمد و برآمد کنٹرول ایکٹ انیس سو پچاس میں ضروری ترامیم کرتے ہوئے ایران کے لیے ٹرانزٹ تجارت کی راہ ہموار کردی ہے۔

حکم نامے کے تحت کسی تیسرے ملک سے روانہ ہونے والا سامان پاکستان کے راستے ایران کے مختلف مقامات تک پہنچایا جاسکے گا۔

سامان کی ترسیل کے لیے متعدد راستے بھی مقرر کیے گئے ہیں، جن میں گوادر، پورٹ قاسم، لیاری، اورماڑہ، پسنی، گبد، خضدار، دالبندین، تفتان، تربت، پنجگور، ناگ، بیسیمہ، کوئٹہ، لک پاس اور نوکنڈی شامل ہیں۔

نوٹیفکیشن میں کہا گیا ہے کہ سامان کی نقل و حمل کسٹمز قوانین اور متعلقہ طریقہ کار کے تحت ہوگی۔