وائٹ ہاؤس ڈنر حملہ آور کی شناخت سامنے آگئی، گرفتار شخص ٹیچر اور گیم ڈویلپر ہے

وائٹ ہاؤس کے نامہ نگاروں کے اعزاز میں منعقدہ عشائیے میں حملے کی کوشش کرنے والے مشتبہ شخص کی شناخت سامنے آگئی ہے، جسے قانون نافذ کرنے والے حکام نے کول تھامس ایلن قرار دیا ہے۔

غیر ملکی خبر رساں ادارے کے مطابق گرفتار شخص لاس اینجلس کا رہائشی ہے جبکہ اس کی عمر اکتیس برس بتائی جا رہی ہے۔

سماجی رابطوں کی ویب سائٹس پر دستیاب معلومات کے مطابق کول تھامس ایلن ایک معروف تعلیمی ادارے کا فارغ التحصیل ہے اور جز وقتی استاد کے ساتھ ساتھ کھیلوں کے پروگرام تیار کرنے کے شعبے سے بھی وابستہ رہا ہے۔

واشنگٹن کے حکام کے مطابق مسلح شخص ہوٹل کی لابی میں سیکریٹ سروس اہلکاروں کی جانب بڑھا جہاں اسے فوری طور پر روک لیا گیا۔

پولیس حکام کا کہنا ہے کہ ابتدائی تحقیقات کے مطابق مشتبہ شخص ہوٹل میں بطور مہمان موجود تھا، تاہم اس کے حملے کے مقصد اور اصل ہدف کے بارے میں تفتیش جاری ہے۔

حکام نے بتایا کہ ہوٹل کی نگرانی کیمرہ ریکارڈنگ کا جائزہ لیا جائے گا تاکہ معلوم ہو سکے کہ وہ ہتھیار اندر کیسے لے گیا۔ گرفتار شخص کے قبضے سے ایک بندوق، ایک پستول اور کئی چاقو برآمد ہوئے ہیں۔