پاکستان نے 2023 کے بعد پہلی بار ایل این جی کارگو کیلئے تین ٹینڈر جاری کر دیے

پاکستان ایل این جی لمیٹڈ (PLL) نے دسمبر 2023 کے بعد پہلی بار مائع قدرتی گیس (LNG) کے کارگو کے لیے ہنگامی ٹینڈر جاری کر دیا ہے، جس کا مقصد مشرقِ وسطیٰ میں جاری جنگ اور سپلائی میں تعطل کے باعث پیدا ہونے والے توانائی کے بحران پر قابو پانا ہے۔ برطانوی خبر رساں ادارے کے مطابق کمپنی نے بین الاقوامی سپلائرز سے تین ایل این جی کارگو کے لیے بولیاں طلب کی ہیں، جن کی ترسیل 27 اپریل سے 14 مئی کے درمیان کراچی کی بن قاسم بندرگاہ پر متوقع ہے۔

وفاقی وزیر توانائی اویس لغاری کا کہنا ہے کہ اس ٹینڈر کا مقصد بجلی کی بڑھتی ہوئی طلب کو پورا کرنا اور مہنگے ڈیزل و فرنس آئل پر انحصار کم کرنا ہے۔ پاکستان کو 28 فروری کو مشرقِ وسطیٰ میں جنگ شروع ہونے کے بعد سے کوئی کارگو موصول نہیں ہوا، کیونکہ ایران نے آبنائے ہرمز سے گزرنے والی شپنگ تقریباً بند کر دی ہے، جس پر قطر کی برآمدات کا بڑا انحصار ہے۔ اس صورتحال میں آذربائیجان کی سرکاری کمپنی ’سوکار‘ نے اسلام آباد کی درخواست پر فوری ایل این جی فراہم کرنے کی آمادگی ظاہر کی ہے۔

حالیہ بحران نے ملک میں بجلی کی لوڈشیڈنگ میں اضافہ کر دیا ہے، جبکہ ہائیڈرو پاور میں کمی نے صورتحال کو مزید پیچیدہ بنا دیا ہے۔ واضح رہے کہ پاکستان نے گزشتہ برسوں میں طلب میں کمی کی توقع پر کئی طویل المدتی معاہدے منسوخ کیے تھے، تاہم موجودہ جغرافیائی و سیاسی حالات نے ملک کو دوبارہ سپلائی کے شدید جھٹکوں سے دوچار کر دیا ہے۔ ماہرین کے مطابق آبنائے ہرمز کی ناکہ بندی سے ایشیائی سپاٹ مارکیٹ میں ایل این جی کی قیمتیں تین سال کی بلند ترین سطح پر پہنچ چکی ہیں۔