صدر ٹرمپ نے امریکا ایران جنگ بندی میں توسیع کا اعلان کردیا

امریکی صدر ڈونلڈ ٹرمپ نے ایران کے ساتھ جاری کشیدگی کے تناظر میں جنگ بندی میں توسیع کا اعلان کرتے ہوئے اپنی افواج کو حملے روکنے کی ہدایت دے دی ہے۔

اپنے بیان میں انہوں نے کہا کہ ایران کی حکومت اندرونی طور پر شدید تقسیم کا شکار ہے، جس کے باعث صورتحال غیر یقینی ہے، تاہم عاصم منیر اور شہباز شریف کی درخواست پر ایران کے خلاف کارروائی کو وقتی طور پر روک دیا گیا ہے۔

امریکی صدر کے مطابق ایرانی قیادت کو موقع دیا جا رہا ہے کہ وہ متفقہ تجویز پیش کرے، جس کے بعد مذاکرات کو آگے بڑھایا جا سکے۔

انہوں نے واضح کیا کہ امریکی افواج کو مکمل تیاری کی حالت میں رہنے کی ہدایت دی گئی ہے اور ناکہ بندی جاری رکھی جائے گی۔

ان کا کہنا تھا کہ جنگ بندی میں توسیع اس وقت تک برقرار رہے گی جب تک ایران کی جانب سے باضابطہ تجویز سامنے نہیں آتی اور مذاکرات کسی نتیجے تک نہیں پہنچ جاتے۔