ایران سے ہونے والا معاہدہ جلد اور اوباما دور کے معاہدے سے بہتر ہوگا: امریکی صدر

امریکی صدر ڈونلڈ ٹرمپ نے کہا ہے کہ ایران کے ساتھ جو نیا معاہدہ کیا جا رہا ہے وہ سابق امریکی صدر باراک اوباما کے دور میں ہونے والے جوہری معاہدے سے کہیں بہتر ہوگا۔

سوشل میڈیا پر اپنے بیان میں ڈونلڈ ٹرمپ نے کہا کہ ایران کے ساتھ جو معاہدہ زیر غور ہے وہ پہلے ہونے والے جوہری معاہدے سے زیادہ مؤثر اور سخت ہوگا۔ ان کے مطابق نئے معاہدے میں ایران کو جوہری ہتھیار حاصل کرنے کی اجازت نہیں دی جائے گی۔

انہوں نے کہا کہ سابق معاہدہ امریکا کی تاریخ کے بدترین معاہدوں میں سے ایک تھا جو ایران کے لیے جوہری صلاحیت حاصل کرنے کا راستہ بن سکتا تھا۔ ٹرمپ نے دعویٰ کیا کہ اس معاہدے کے دوران ایران کو بھاری مالی رقوم بھی فراہم کی گئیں جن پر شدید تنقید کی گئی۔

امریکی صدر نے مزید کہا کہ ان کی کوشش ہے کہ ایسا معاہدہ کیا جائے جو عالمی امن، سلامتی اور استحکام کی ضمانت دے اور جس پر دنیا فخر کرے۔

ٹرمپ کے مطابق نئے معاہدے کا مقصد صرف ایک ہے کہ ایران کسی بھی صورت میں جوہری ہتھیار تک نہ پہنچ سکے۔