اسرائیل اور لبنان کے درمیان امن مذاکرات جمعرات کو واشنگٹن میں ہوں گے

امریکا کی میزبانی میں اسرائیل اور لبنان کے درمیان امن مذاکرات کا دوسرا دور جمعرات کو واشنگٹن میں منعقد کیا جائے گا۔ امریکی محکمۂ خارجہ کے ایک اعلیٰ عہدیدار کے مطابق یہ بات چیت سفرا کی سطح پر ہوگی۔

امریکی حکام کے مطابق 14 اپریل سے شروع ہونے والے مذاکراتی عمل میں مثبت پیش رفت سامنے آئی ہے، اور وزیر خارجہ مارکو روبیو کی قیادت میں امریکا ان براہِ راست مذاکرات کو سہولت فراہم کرتا رہے گا۔

یاد رہے کہ حزب اللہ کے باعث اسرائیل اور لبنان کے درمیان جنوبی لبنان میں شدید جھڑپیں ہو چکی ہیں، جن کے بعد چھ ہفتوں کی لڑائی کے بعد فی الحال دس روزہ جنگ بندی نافذ ہے۔

گزشتہ ہفتے دونوں ممالک کے درمیان 1993 کے بعد پہلی بار باضابطہ سفارتی مذاکرات ہوئے تھے جنہیں امریکی صدر نے ایک تاریخی موقع قرار دیا تھا۔