امریکا کا ایرانی تجارتی جہاز پر قبضہ، ایران کا ’بحری قزاقی‘ کا جواب دینے کا اعلان

خلیج عمان میں صورتحال انتہائی دھماکہ خیز رخ اختیار کر گئی ہے جہاں امریکی بحریہ نے ایران کے ایک تجارتی کارگو جہاز کو فائرنگ کے بعد قبضے میں لے لیا ہے۔ امریکی صدر ڈونلڈ ٹرمپ نے اس کارروائی کی تصدیق کرتے ہوئے دعویٰ کیا ہے کہ یہ جہاز امریکی پابندیوں کی خلاف ورزی اور غیر قانونی سرگرمیوں میں ملوث تھا۔

امریکی سینٹرل کمانڈ (CENTCOM) کی جانب سے جاری کردہ ویڈیو میں دیکھا جا سکتا ہے کہ امریکی بحری جہاز نے ‘توسکا’ نامی ایرانی کارگو شپ کو وارننگ دی اور رکنے کا حکم دیا۔ صدر ٹرمپ کے مطابق، جب جہاز نے وارننگ کو نظر انداز کیا تو امریکی نیوی نے اس کے انجن روم پر فائرنگ کی جس سے اس میں بڑا سوراخ ہو گیا، جس کے بعد امریکی میرینز جہاز پر سوار ہو گئے۔

دوسری جانب ایران نے اس واقعے پر شدید ردِعمل دیتے ہوئے اسے ‘مسلح بحری ڈکیتی’ اور ‘سمندری راہزنی’ قرار دیا ہے۔ ایرانی عسکری حکام کا کہنا ہے کہ یہ اقدام جنگ بندی کی کھلی خلاف ورزی ہے اور ایران اس جارحیت کا بھرپور اور فوری جواب دینے کا حق محفوظ رکھتا ہے۔