مذاکرات میں حتمی معاہدہ نہیں ہواتوجنگ بندی میں توسیع نہیں ہوگی، امریکی صدر

امریکی صدر ڈونلڈ ٹرمپ نے خبردار کیا کہ اگر 22 اپریل تک مذاکرات کے نتیجے میں کوئی حتمی معاہدہ نہ ہوا تو ایران کے ساتھ عارضی جنگ بندی میں توسیع نہیں ہوسکتی۔

میڈیا رپورٹس کے مطابق ائیر فورس ون میں سوار صحافیوں سے بات کرتے ہوئے ٹرمپ نے فوجی آپریشن دوبارہ شروع کرنے کے امکان پر بات کی۔انہوں نے کہا کہ جنگ بندی معاہدے میں شاید میں توسیع نہیں کروں گا۔ ناکہ بندی جاری ہے اور بدقسمتی سے ہمیں دوبارہ بم گرانا پڑے گا۔

امریکی صدر ڈونلڈ ٹرمپ کا کہنا تھاکہ  ایران سے متعلق کوئی سرپرائز ہو سکتا ہے۔،میرے خیال میں یہ بہت مثبت چیز ہوگی۔برطانوی خبر ایجنسی کے  مطابق امریکی صدر کا کہنا تھا ایک بہت اچھی اورذہین شخصیت وائٹ ہاؤس آرہی ہے، ایک ایسی شخصیت جسے اپنے ملک اور ملک سے باہر کی بہت فکر ہے، ہم  ایک غیرمعمولی نیوزکانفرنس کرنے جا رہے ہیں۔امریکی صدر کا کہنا تھا ایران کو کسی صورت جوہری ہتھیار حاصل کرنے نہیں دیں گے ، میرے نمائندے مذاکرات کر رہے ہیں، حتمی فیصلہ میں کرتا ہوں۔

ڈونلڈ ٹرمپ نے کہا کہ معاہدہ ہونےکےبعد ہم ایران سےنیوکلیئر مواد لے کرامریکا لے آئیں گے، اگرایسا نہ ہوا تو ہم اورزیادہ سخت طریقے سے نیوکلیئرمواد حاصل کریں گے، ممکن ہے میں جنگ بندی میں توسیع نہ کروں لیکن ناکہ بندی برقرار رہے گی۔

انہوں نے کہا کہ لبنان کو دوبارہ ایک مستحکم ملک بنانے میں مدد کریں گے، لبنان نے طویل عرصے تک مشکلات کا سامنا کیا ہے، اسرائیلی وزیراعظم سےکچھ معاملات پر ہمارے اختلافات  ہیں۔

واضح رہے کہ موجودہ عارضی جنگ بندی 8 اپریل کو شروع ہوئی تھی اور چار دن میں ختم ہونے والی ہے جبکہ 11 سے 12 اپریل کواسلام آبادمیں  ہونے والے مذاکرات کا پہلا دور کسی اعلان کردہ معاہدے کے بغیر اختتام پذیر ہوا۔