ایران معاہدے کے لیے بےتاب، متعدد نکات طے مگر یورینیم پر اختلاف برقرار: صدر ٹرمپ

امریکی صدر ڈونلڈ ٹرمپ نے کہا ہے کہ ایران کے ساتھ جاری مذاکرات میں کئی اہم نکات پر اتفاق ہوچکا ہے، تاہم یورینیم کے معاملے پر اختلافات تاحال برقرار ہیں۔

انہوں نے بتایا کہ ایران نے خود امریکا سے دوبارہ رابطہ کیا اور معاہدے کے لیے اپنی خواہش کا اظہار کیا۔ صدر ٹرمپ کے مطابق پیر کی صبح انہیں ایسے افراد کی کال موصول ہوئی جو معاہدہ کرنا چاہتے تھے، جس سے مذاکرات میں پیش رفت کی امید پیدا ہوئی۔

صدر ٹرمپ کا کہنا تھا کہ امریکی وفد نے تعمیری انداز میں بات چیت کی، تاہم ایران کا رویہ مناسب نہیں رہا۔ اس کے باوجود انہوں نے امید ظاہر کی کہ باقی معاملات پر بھی اتفاق رائے ممکن ہے۔

آبنائے ہرمز کے حوالے سے انہوں نے کہا کہ یہ عالمی سطح پر نہایت اہم گزرگاہ ہے اور کئی ممالک نے ایران کے خلاف اقدامات میں تعاون کی پیش کش کی، تاہم امریکا کو کسی مدد کی ضرورت نہیں۔

انہوں نے مزید کہا کہ حالیہ دنوں میں آبنائے ہرمز سے درجنوں جہازوں کی آمد و رفت جاری رہی، جبکہ ایران کے افزودہ یورینیم کے معاملے پر بھی حکمت عملی اختیار کی جائے گی۔

صدر ٹرمپ نے واضح کیا کہ ایران کو کسی صورت جوہری ہتھیار رکھنے کی اجازت نہیں دی جائے گی اور کسی بھی قسم کی بلیک میلنگ کو قبول نہیں کیا جائے گا۔