امریکا ایران مذاکرات بے نتیجہ رہنا مایوس کن، دوبارہ مذاکرات کی میز پر آئیں: آسٹریلیا

آسٹریلیا نے امریکا اور ایران کے درمیان مذاکرات کے بے نتیجہ ختم ہونے پر افسوس کا اظہار کرتے ہوئے دونوں ممالک سے دوبارہ مذاکرات کی میز پر آنے کا مطالبہ کیا ہے۔

سڈنی سے جاری بیان میں آسٹریلوی وزیر خارجہ پینی وونگ نے کہا کہ اسلام آباد میں ہونے والے امریکا اور ایران کے مذاکرات کا کسی معاہدے کے بغیر ختم ہونا مایوس کن ہے۔

انہوں نے کہا کہ موجودہ صورتحال میں سب سے اہم بات جنگ بندی کو برقرار رکھنا اور فوری طور پر سفارتی عمل کو دوبارہ شروع کرنا ہے۔

پینی وونگ کے مطابق آسٹریلیا خطے میں امن اور استحکام کا خواہاں ہے اور چاہتا ہے کہ تنازع کا حل جلد از جلد پرامن طریقے سے نکالا جائے۔

انہوں نے خبردار کیا کہ کشیدگی میں اضافہ نہ صرف خطے بلکہ عالمی معیشت اور انسانی صورتحال پر بھی منفی اثرات ڈال سکتا ہے۔