ایران کی سپریم نیشنل سیکورٹی کونسل نے جنگ بندی معاہدے کی توثیق کردی، مذاکرات 10 اپریل کو اسلام آباد میں ہوں گے

ایران کی سپریم نیشنل سیکورٹی کونسل نے جنگ بندی معاہدے کی توثیق کردی ہے۔

ایرانی سپریم سکیورٹی کونسل کے مطابق پاکستان کے ذریعے امریکا کو دس نکات پر مشتمل تجویز بھی ارسال کی گئی ہے، جس کی بنیاد پر آئندہ مذاکرات کیے جائیں گے۔

ذرائع کے مطابق ان مذاکرات کی تفصیلات کو حتمی شکل دینے کے لیے ایران اور امریکا کے درمیان بات چیت اسلام آباد میں ہوگی، جس کا آغاز جمعہ 10 اپریل سے متوقع ہے۔

ایرانی حکام کا کہنا ہے کہ اگر دونوں فریقین کے درمیان اتفاق رائے قائم ہو گیا تو مذاکرات کی مدت میں مزید توسیع بھی کی جا سکتی ہے۔

دوسری جانب امریکی صدر ڈونلڈ ٹرمپ پہلے ہی وزیراعظم شہباز شریف کی اپیل پر دو ہفتے کی جنگ بندی کا اعلان کر چکے ہیں، جبکہ ایران کی جانب سے پیش کردہ تجاویز کو بھی قابل عمل قرار دیا گیا ہے۔