مذاکرات کیلئے اسلام آباد جانے سے کبھی انکار نہیں کیا: ایرانی وزیر خارجہ

ایرانی وزیر خارجہ عباس عراقچی نے امریکی میڈیا کی رپورٹس کو مسترد کرتے ہوئے واضح کیا ہے کہ ایران نے کبھی بھی مذاکرات کے لیے اسلام آباد جانے سے انکار نہیں کیا۔

سوشل میڈیا پر جاری ایک ویڈیو پیغام میں عباس عراقچی نے پاکستان کی ثالثی کی کوششوں کو سراہتے ہوئے ان کا شکریہ ادا کیا۔ انہوں نے کہا کہ ایرانی مؤقف کو امریکی میڈیا کی جانب سے غلط انداز میں پیش کیا جا رہا ہے۔ ایرانی وزیر خارجہ نے زور دے کر کہا، “ہم ثالثی کے لیے پاکستان کی مخلصانہ کوششوں کے شکر گزار ہیں اور ایران نے کبھی بھی اسلام آباد میں مذاکرات کرنے سے معذرت نہیں کی۔”

 یاد رہے کہ گزشتہ روز امریکی اخبار ‘واشنگٹن پوسٹ’ نے ایک رپورٹ میں دعویٰ کیا تھا کہ ایران نے اسلام آباد میں امریکی حکام سے ملاقات کرنے سے انکار کر دیا ہے اور امریکی مطالبات کو ناقابل قبول قرار دیا ہے۔ رپورٹ میں یہ بھی کہا گیا تھا کہ اب قطر یا ترکیے جیسے متبادل مقامات پر مذاکرات کی کوششیں کی جا رہی ہیں۔

 عباس عراقچی نے ویڈیو میں مزید کہا کہ وہ غیر قانونی جنگ کے حتمی اور دیرپا خاتمے کی شرائط کے حوالے سے فکر مند ہیں۔ انہوں نے دوٹوک الفاظ میں کہا کہ “جنگ ہم پر مسلط کی گئی ہے”۔ اپنے پیغام کے آخر میں ایرانی وزیر خارجہ نے پاکستان کے ساتھ برادرانہ تعلقات اور احترام کا اظہار کرتے ہوئے ‘پاکستان زندہ باد’ کا نعرہ بھی لگایا۔

سیاسی مبصرین کے مطابق، ایرانی وزیر خارجہ کا یہ بیان خطے میں جاری تناؤ کے خاتمے کے لیے پاکستان کے کلیدی کردار کی اہمیت کو اجاگر کرتا ہے اور بین الاقوامی سطح پر پھیلی غلط فہمیوں کو دور کرنے کی ایک کوشش ہے۔