ایران کا ریسکیو مشن میں شامل امریکی ہیلی کاپٹر اور ڈرون تباہ کرنے کا دعویٰ

ایران نے امریکا کے خلاف فضائی کارروائیوں میں شدت لاتے ہوئے دعویٰ کیا ہے کہ ریسکیو مشن کیلئے جانے والے امریکی ہیلی کاپٹرز اور ڈرون جہاز کو بھی نشانہ بنا دیا گیا ہے۔

رپورٹس کے مطابق ایران نے اپنی فضائی حدود اور آبنائے ہرمز کے قریب امریکی جنگی طیاروں کو نشانہ بنانے کا سلسلہ جاری رکھا ہوا ہے اور آج مزید طیارے مار گرانے کا دعویٰ کیا گیا ہے۔

امریکی حکام نے اس بات کی تصدیق کی ہے کہ ایک F-15E Strike Eagle اور ایک A-10 Thunderbolt II طیارہ تباہ ہوا ہے۔

امریکی ذرائع کے مطابق ایف پندرہ طیارے میں پائلٹ اور عملے کا ایک رکن سوار تھا، جن میں سے ایک کو محفوظ نکال لیا گیا جبکہ دوسرے کی تلاش کیلئے آپریشن جاری ہے۔

ایرانی حکام کے مطابق ریسکیو آپریشن کے دوران دو امریکی ہیلی کاپٹرز اور ایک بغیر پائلٹ طیارے کو بھی نشانہ بنایا گیا، تاہم امریکی عہدیدار نے کہا ہے کہ تمام اہلکار محفوظ ہیں۔

ایرانی فوج نے مزید دعویٰ کیا ہے کہ خلیج فارس کے جنوبی حصے میں ایک اور امریکی طیارہ تباہ کیا گیا، لیکن اس حوالے سے صورتحال تاحال واضح نہیں ہو سکی۔