آبنائے ہرمز کھولنے کیلئے 40 سے زائد ممالک متحد ہو چکے، برطانوی سیکرٹری خارجہ

لندن: برطانوی سیکرٹری خارجہ ایویٹ کوپر نے بین الاقوامی نشریاتی اداروں کو دیے گئے انٹرویو میں انکشاف کیا ہے کہ ایران کی جانب سے آبنائے ہرمز کی بندش اور بحری جہازوں پر ‘غیر ذمہ دارانہ’ حملوں کے خلاف 40 سے زائد ممالک ایک پلیٹ فارم پر جمع ہو گئے ہیں۔ انہوں نے واضح کیا کہ یہ اتحاد سفارتی، معاشی اور ضرورت پڑنے پر مشترکہ فوجی اقدامات کے ذریعے اس عالمی گزرگاہ کو دوبارہ بحال کرانے کے لیے پُرعزم ہے۔

ایویٹ کوپر کا کہنا تھا کہ ایران کے ان اقدامات سے نہ صرف برطانیہ میں مورگیج (قرضوں) کی شرح اور پیٹرول کی قیمتیں متاثر ہو رہی ہیں، بلکہ ایشیا کو گیس، افریقہ کو کھاد اور پوری دنیا کو جیٹ فیول کی فراہمی میں شدید رکاوٹیں آ رہی ہیں۔ انہوں نے ایران پر الزام عائد کیا کہ وہ عالمی معیشت کو یرغمال بنانے کی کوشش کر رہا ہے۔ اقوامِ متحدہ کی رپورٹ کے مطابق، اس وقت 2 ہزار کے قریب مال بردار جہاز خلیج فارس میں پھنسے ہوئے ہیں، جن کی بحالی کے لیے انٹرنیشنل میری ٹائم آرگنائزیشن کے ساتھ مل کر ہنگامی حکمتِ عملی تیار کی جا رہی ہے۔