امریکی صدر نے اٹارنی جنرل پام بونڈی کو عہدے سے ہٹا دیا، قائم مقام کے طور پر ٹوڈ بلانش مقرر

امریکی صدر ڈونلڈ ٹرمپ نے اٹارنی جنرل پام بونڈی کو عہدے سے ہٹا دیا ہے اور ان کی جگہ نائب اٹارنی جنرل ٹوڈ بلانش کو قائم مقام اٹارنی جنرل مقرر کر دیا ہے۔

صدر ٹرمپ نے اپنے بیان میں کہا کہ پام بونڈی نجی شعبے میں ایک اہم ذمہ داری سنبھالنے جا رہی ہیں۔ انہوں نے بونڈی کی خدمات کو سراہتے ہوئے انہیں ایک محب وطن اور وفادار ساتھی قرار دیا۔

ذرائع کے مطابق صدر ٹرمپ بونڈی کی کارکردگی سے مختلف معاملات پر ناخوش تھے، جن میں جیفری ایپسٹین سے متعلق فائلوں کا معاملہ اور سیاسی مخالفین کے خلاف محدود کارروائیاں شامل تھیں۔

یہ بھی بتایا گیا ہے کہ حالیہ ہفتوں میں صدر ٹرمپ نے بونڈی کو عہدے سے ہٹانے کے امکان پر قریبی ساتھیوں سے مشاورت کی تھی اور اس حوالے سے ان سے براہ راست گفتگو بھی کی گئی۔

پام بونڈی نے اپنے بیان میں کہا ہے کہ وہ آئندہ ایک ماہ میں اپنی ذمہ داریاں ٹوڈ بلانش کو منتقل کریں گی اور بعد ازاں نجی شعبے میں خدمات انجام دیں گی۔