ایرانیوں کے رہائشی سٹیٹس میں تبدیلی کی خبریں غلط ہیں: اماراتی وزارت خارجہ

ابوظہبی: متحدہ عرب امارات کی وزارتِ خارجہ نے ان میڈیا رپورٹس کو قطعی طور پر غلط قرار دیا ہے جن میں دعویٰ کیا گیا تھا کہ یو اے ای حکومت ایرانی باشندوں کے رہائشی ویزے منسوخ کر رہی ہے۔ عرب نیوز کے مطابق، وزارت نے اپنے سرکاری بیان میں واضح کیا ہے کہ ایرانی کمیونٹی متحدہ عرب امارات کے سماجی اور معاشی ڈھانچے کا ایک قابلِ قدر حصہ ہے اور ان کے ساتھ کسی قسم کا امتیازی سلوک نہیں کیا جا رہا۔

بیان میں کہا گیا ہے کہ یو اے ای میں 200 سے زائد ممالک کے شہری مقیم ہیں اور تمام رہائشیوں کے لیے ادارے کے قواعد و ضوابط اور منظور شدہ طریقہ کار بلا تفریق نافذ العمل ہیں۔ وزارتِ خارجہ نے اس بات پر زور دیا کہ ریاست “قانون کی حکمرانی، رواداری اور بقائے باہمی” کے اصولوں پر کاربند ہے اور تمام مقیم افراد کی حفاظت اور بہبود حکومت کی اولین ترجیح ہے۔

یہ وضاحت ایک ایسے وقت میں سامنے آئی ہے جب مشرقِ وسطیٰ میں کشیدگی عروج پر ہے اور ایران کی جانب سے خطے میں مختلف مقامات پر کارروائیاں کی جا رہی ہیں۔ تاہم، یو اے ای نے واضح کر دیا ہے کہ سیاسی و عسکری حالات کے باوجود اس کے متنوع اور کھلے ماحول میں مقیم غیر ملکیوں کے حقوق کا تحفظ کیا جائے گا۔