لبنان میں حزب اللہ کے سینئر کمانڈر یوسف ہاشم اسرائیلی حملے میں شہید

بیروت: لبنانی وزارتِ صحت اور سکیورٹی ذرائع نے تصدیق کی ہے کہ اسرائیل نے بیروت کے علاقے میں ایک ٹارگٹڈ کارروائی کرتے ہوئے تین گاڑیوں کو تین میزائلوں سے نشانہ بنایا۔ اس زوردار دھماکے کے نتیجے میں حزب اللہ کے سینیئر کمانڈر یوسف اسماعیل ہاشم سمیت سات افراد جاں بحق ہو گئے ہیں۔ لبنانی حکام کے مطابق حملہ اس وقت ہوا جب یوسف ہاشم ایک خیمے کے اندر اہم میٹنگ میں مصروف تھے۔

یوسف اسماعیل ہاشم حزب اللہ کی صفوں میں 40 سالہ طویل عسکری تجربہ رکھتے تھے اور وہ تنظیم کی اہم ترین خصوصی کمیٹیوں کے رکن تھے۔ انہوں نے 2024ء میں علی کرکی کی شہادت کے بعد اہم عسکری ذمہ داریاں سنبھالی تھیں۔ سکیورٹی ذرائع کا کہنا ہے کہ یوسف ہاشم ماضی میں عراق میں حزب اللہ کے عسکری امور کے انچارج بھی رہ چکے تھے، جو ان کی تزویراتی اہمیت کا منہ بولتا ثبوت ہے۔

حزب اللہ نے اپنے ایک اور رکن محمد باقر نابلسی کی شہادت کی بھی تصدیق کی ہے، جو بیروت کے علاقے جناح پر ہونے والے ایک اور حملے میں نشانہ بنے۔ مبصرین کا ماننا ہے کہ یوسف ہاشم اس جنگ کے آغاز سے اب تک اسرائیل کی جانب سے نشانہ بنائے جانے والے حزب اللہ کے اعلیٰ ترین عہدے داروں میں سے ایک ہیں، اور ان کی شہادت سے خطے میں محاذ آرائی کے مزید تیز ہونے کا خدشہ ہے۔