جنگ ختم کرنے کو تیار، ضمانت دی جائے تنازع دوبارہ شروع نہیں ہوگا: ایرانی صدر

تہران: ایرانی صدر مسعود پزشکیان نے یورپی کونسل کے صدر انتونیو کوستا سے ٹیلیفونک رابطے میں ایک اہم تجویز پیش کرتے ہوئے کہا ہے کہ ایران، امریکہ اور اسرائیل کے خلاف جاری لڑائی کو ختم کرنے کے لیے تیار ہے، بشرطیکہ اسے بین الاقوامی سطح پر یہ ضمانت دی جائے کہ مستقبل میں ایران پر دوبارہ حملہ نہیں کیا جائے گا۔

صدر پزشکیان نے واضح کیا کہ ایران اپنے ہمسایہ ممالک کی خودمختاری کا ہمیشہ احترام کرتا ہے اور ان کا مقصد خطے کی ریاستوں کو نقصان پہنچانا نہیں، تاہم ان ممالک میں موجود امریکی اڈوں سے ہونے والی کارروائیوں نے ایران کو جوابی حملوں پر مجبور کیا۔ انہوں نے ایرانی عوام کے اتحاد اور فوج کی مزاحمت کو موجودہ بحران سے نکلنے کا بنیادی ستون قرار دیا۔

دوسری جانب ایرانی وزیر خارجہ عباس عراقچی نے عرب میڈیا کو دیے گئے انٹرویو میں انکشاف کیا ہے کہ اگرچہ امریکہ کے ساتھ براہِ راست باضابطہ مذاکرات نہیں ہو رہے، لیکن امریکی نمائندہ خصوصی کی جانب سے پیغامات موصول ہو رہے ہیں۔ انہوں نے ایک اہم انکشاف کرتے ہوئے تصدیق کی کہ سکیورٹی سے متعلق حساس نوعیت کی بات چیت پاکستان کے ذریعے جاری ہے۔ ایران کا موقف ہے کہ وہ محض عارضی جنگ بندی نہیں بلکہ اس تنازع کا مکمل اور جامع خاتمہ چاہتا ہے۔