امریکی طیارہ بردار جنگی جہاز مشرق وسطیٰ روانہ، ہزاروں فوجی سوار

واشنگٹن: امریکی طیارہ بردار جنگی بحری جہاز یو ایس ایس جارج ڈبلیو بش مشرق وسطیٰ کی جانب روانہ ہو گیا ہے، جس پر ہزاروں امریکی فوجی تعینات ہیں۔

امریکی میڈیا کے مطابق جہاز پر موجود فوجیوں کی بڑی تعداد ایسے نوجوان اہلکاروں پر مشتمل ہے جنہوں نے حال ہی میں اپنی تربیت مکمل کی ہے اور یہ ان کی پہلی تعیناتی ہے۔

ذرائع کے مطابق اس تعیناتی پر بعض اہل خانہ نے تشویش اور برہمی کا اظہار کیا ہے، ان کا کہنا ہے کہ نئے تربیت یافتہ فوجیوں کو براہ راست ممکنہ جنگی صورتحال میں بھیجا جا رہا ہے۔

رپورٹس کے مطابق اس جنگی جہاز پر تقریباً چار ہزار امریکی فوجی موجود ہیں، جبکہ مشرق وسطیٰ میں امریکی بحریہ کے تین بڑے جنگی جہاز تعینات ہیں۔

دوسری جانب ایک اور طیارہ بردار جہاز جیرالڈ فورڈ کو مرمت کے لیے یورپ بھیج دیا گیا ہے۔