مشرق وسطیٰ کشیدگی: پاکستان اور چین کا فوری جنگ بندی پر زور

بیجنگ: پاکستان اور چین نے مشرقِ وسطیٰ میں جاری کشیدگی کو عالمی امن کے لیے بڑا خطرہ قرار دیتے ہوئے تمام فریقین سے فوری مذاکرات اور جنگ بندی کا مطالبہ کر دیا ہے۔ بیجنگ میں نائب وزیراعظم اسحاق ڈار اور چینی وزیر خارجہ وانگ ای کے درمیان ہونے والی ملاقات میں اس بات پر زور دیا گیا کہ ایران اور خلیجی ممالک کی خودمختاری اور سرحدی سالمیت کا ہر صورت احترام کیا جائے۔

اعلامیے کے مطابق، دونوں ممالک نے آبنائے ہرمز میں تجارتی جہازوں کی حفاظت اور اس اہم بحری راستے کو فوری طور پر معمول پر لانے کی ضرورت پر زور دیا۔ چین اور پاکستان نے دو ٹوک موقف اختیار کیا ہے کہ توانائی کے مراکز، پانی کے ذخائر اور خصوصاً پرامن نیوکلیئر تنصیبات پر حملے بین الاقوامی قوانین کی سنگین خلاف ورزی ہیں جنہیں فوری بند ہونا چاہیے۔

ملاقات میں پاکستان کی ان سفارتی کوششوں کا بھی ذکر کیا گیا جس کے تحت اسلام آباد میں سعودی عرب، مصر اور ترکیہ کے وزرائے خارجہ نے سر جوڑے تھے۔ چینی وزارتِ خارجہ نے پاکستان کے اس فعال سفارتی کردار کو سراہتے ہوئے کہا کہ دونوں ممالک علاقائی استحکام کے لیے یکساں موقف رکھتے ہیں۔ اعلامیے کے اختتام پر اقوامِ متحدہ کے منشور کے تحت ایک جامع ‘امن فریم ورک’ کی تشکیل کی اپیل کی گئی تاکہ خطے کو مزید تباہی سے بچایا جا سکے۔