ایران کی جانب سے پاکستان کے سفارتی اقدامات کا خیرمقدم

اسلام آباد: پاکستان میں متعین ایرانی سفیر رضا امیری مقدم نے ایران اور امریکہ کے درمیان جاری حالیہ کشیدگی کو کم کرنے کے لیے پاکستان کے فعال سفارتی کردار کی بھرپور حمایت اور ستائش کی ہے۔ ایرانی سفیر نے اپنے ایک خصوصی بیان میں کہا کہ تہران، امریکہ اور اسرائیل کی جانب سے ایران کے خلاف کی جانے والی جارحیت کو رکوانے کے لیے اسلام آباد کی مسلسل کوششوں کو قدر کی نگاہ سے دیکھتا ہے۔

ایرانی سفیر نے مزید کہا کہ خطے میں امن و استحکام کی بحالی کے لیے پاکستان کے اقدامات ‘مثبت اور نیک نیتی’ پر مبنی ہیں۔ انہوں نے واضح کیا کہ ایران کے خلاف غیر منصفانہ اور غیر قانونی جارحیت کے خاتمے اور عالمی سطح پر اعتماد کی بحالی کے لیے پاکستان جو فعال سفارتی کاوشیں کر رہا ہے، وہ قابلِ ستائش ہیں۔ رضا امیری مقدم کا کہنا تھا کہ خطے میں پائیدار استحکام کے لیے پاکستان کی سفارت کاری کی بحالی کی کوششیں وقت کی اہم ضرورت ہیں۔

واضح رہے کہ پاکستان مشرقِ وسطیٰ میں جنگ کے بادل چھٹنے اور کشیدگی کو مذاکرات کے ذریعے حل کرنے کے لیے مسلسل عالمی برادری اور علاقائی طاقتوں کے ساتھ رابطے میں ہے۔ ایران کی جانب سے اس کھلے اعتراف کو عالمی سفارتی حلقوں میں پاکستان کی ایک بڑی کامیابی قرار دیا جا رہا ہے۔